AVROPA ŞURASININ MƏRUZƏÇİSİ AZƏRBAYCANDA HƏYATA KEÇİRİLƏN İSLAHATLARDAN RAZIDIR
Nümayəndə heyətinin başçısı, Milli Məclisin beynəlxalq münasibətlər və parlamentlərarası əlaqələr daimi komissiyasının sədri Səməd Seyidov bu səfərin Azərbaycan üçün mühüm əhəmiyyətə malik olduğunu bildirərək demişdir ki, mayın 10-da Azərbaycan xalqı ümummilli liderimiz Heydər Əliyevin anadan olmasının 81-ci ildönümünü qeyd etmişdir. Heydər Əliyev milli tariximizdə yeganə şəxsiyyətdir ki, Azərbaycan dövlətini Avropaya tanıtmış və onun beynəlxalq aləmə inteqrasiyasını təmin etmişdir. Ulu öndərimizin ildönümü ilə əlaqədar Azərbaycan Prezidenti İlham Əliyev geniş əfv Fərmanı imzalamışdır. Həmin Fərman Azərbaycan dövlətinin humanist siyasət yürütdüyünü bir daha təsdiq edir. Bu yaxınlarda Prezident İlham Əliyev Avropa Şurasında geniş məruzə ilə çıxış etmiş və demişdir ki, Azərbaycan Avropa və dünya dəyərlərinə hörmətlə yanaşır. Azərbaycanda insan haqları ən yüksək səviyyədə müdafiə olunur. Çox şadam ki, siz də Azərbaycandakı bu prosesləri izləyir və yüksək qiymətləndirirsiniz.
S.Seyidov onu da qeyd etmişdir ki, Prezidentin imzaladığı əfv fərmanları heç də Avropa Şurası ilə birbaşa əlaqəli deyildir. Bu fərmanlar dövlətimizin demokratiya, insan hüquqları prinsiplərinə sadiqliyinə, sivil cəmiyyət qurmaq istiqamətində görülən işlərə bariz nümunədir.
Siz AŞPA-nın siyasi məhbuslar üzrə məruzəçisisiniz. Sizin obyektiv insan olduğunuzu bilir və hesab edirik ki, Azərbaycanın ən ağrılı problemi Ermənistan-Azərbaycan, Dağlıq Qarabağ münaqişəsi diqqətinizdən kənarda deyildir. Azərbaycanın bu məsələdə mövqeyi sizə bəllidir. Biz ümid edirik ki, sizin məruzənizdə Azərbaycanda insan hüquqları, demokratik dövlət quruculuğu istiqamətində atılan addımlar öz obyektiv qiymətini tapacaq və bizim sülhsevər dövlət olduğumuz bir daha sübut olunacaqdır.
Səmimi qəbul və ətraflı məlumat üçün təşəkkür edən Malkolm Bryus demişdir ki, biz Azərbaycan nümayəndə heyəti ilə çox konstruktiv dialoq aparırıq. Bu dialoq hər iki tərəf üçün mühüm əhəmiyyət kəsb edir və Azərbaycan xalqının rifah halının yaxşılaşdırılmasına xidmət edir. Mən Azərbaycana altı ay öncə gəlmişdim. Ötən müddət ərzində çox mühüm dəyişikliklər, tərəqqi baş vermişdir. Azərbaycan Prezidentinin Avropa Şurasındakı çıxışı məndə və həmkarlarımda böyük təəssürat yaratdı. Prezident real addımlar atır və bu addımlar tərəfimizdən dəstəklənir. Başa düşürük ki, məsələnin tam həlli uzun vaxt tələb edir. Amma proseslərin bu cür davam etməsi bizdə nikbinlik yaradır. Prezident İlham Əliyevin sonuncu Fərmanı Azərbaycanla Avropa Şurası arasındakı münasibətlərin inkişafına təkan verəcək. Bu da Azərbaycan xalqının istədiyi demokratik dövlət quruculuğuna səbəb olacaqdır.
Görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.
Bölmənin digər xəbərləri
