Aygül Kuspan: Azərbaycanın TÜRKPA-dakı sədrliyi səmərəli olub
Astana, 13 iyun, AZƏRTAC
Azərbaycanın TÜRKPA-dakı sədrliyi dövründə bir çox əhəmiyyətli tədbirlər təşkil olunub.
AZƏRTAC xəbər verir ki, bu barədə Qazaxıstan Parlamenti Məclisinin Beynəlxalq əlaqələr, müdafiə və təhlükəsizlik komitəsinin sədri Aygül Kuspan jurnalistlərə açıqlamasında bildirib.
Onun sözlərinə görə, Azərbaycanın sədrliyi dövründə iqlim dəyişikliyi məsələlərinə, eləcə də tranzit-nəqliyyat əməkdaşlığının inkişafına, o cümlədən Trans-Xəzər beynəlxalq nəqliyyat dəhlizinin təşviqinə xüsusi diqqət yetirilib.
Aygül Kuspan vurğulayıb ki, Azərbaycanın sədrliyi üzv dövlətlər arasında əməkdaşlığın konsolidasiyasına, möhkəmləndirilməsinə, dərinləşdirilməsinə və yeni məzmunla zənginləşdirilməsinə töhfə verib.
“Hesab edirik ki, bu dövr son dərəcə səmərəli keçib və bu münasibətlə azərbaycanlı həmkarlarımızı səmimi qəlbdən təbrik etdik”, – deyə Aygül Kuspan əlavə edib.
Xatırladaq ki, Astanada TÜRKPA Şurasının iclası və “TURKTIME – parlament diplomatiyasının rolu” mövzusunda plenar iclas keçirilib.
Plenar iclasın yekunlarına əsasən TÜRKPA-ya sədrlik Qazaxıstana təhvil verilib və Astana Bəyannaməsi qəbul olunub.
TÜRKPA-nın növbəti XV iclası Qırğızıstanda keçiriləcək.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
