Azad edilmiş ərazilərdə ilk olaraq iridırnaqlı heyvanların tarixi arealları bərpa olunacaq
Bakı, 26 oktyabr, AZƏRTAC
Azad edilmiş ərazilərdə reintroduksiya layihələrinə ceyranlarla başlanıldı. Belə ki, Cəbrayıl rayonunda otuz üç baş ceyran təbiətə buraxıldı. Proses ceyranların stabil populyasiyası yaranana kimi davam edəcək. Qarabağ və Şərqi Zəngəzurda bezoar keçiləri, marallar, köpgərlərin, yəni, ilk olaraq əsasən iridırnaqlı heyvanların tarixi arealları bərpa ediləcək. Bundan sonra yırtıcı heyvanlar populyasiyalarını özləri bərpa edəcəklər. Çünki həmin heyvanlarla qidalanırlar. Qida bazası yaranandan sonra yırtıcı heyvanlar da kənar ərazilərdən gəlib öz populyasiyalarını həmin ərazilərdə bərpa edirlər.
AZƏRTAC xəbər verir ki, bunu Ümumdünya Vəhşi Təbiət Fondunun Azərbaycan nümayəndəliyinin rəhbəri Elşad Əsgərov Ekologiya və Təbii Sərvətlər Nazirliyinin feysbuk səhifəsində yayımlanan “Ekspert saatı”nda deyib.
E.Əsgərov bildirib ki, reintroduksiya layihələrinə 2010-cu ildən start verilib və ilk olaraq ceyranların reintroduksiyası aparılıb: “Ceyranların sayı ötən əsrdə azalıb. Ceyran populyasiyasının əsas məkanı olan indiki Şirvan Milli Parkında 60-cı illərdə cəmi 60-70 ceyran qalmışdı. Həmin ərazi xüsusi mühafizə olunan təbiət ərazisi elan olunandan sonra həmin heyvanların sayı artmağa başladı. Ümumiyyətlə, sayı tez artan heyvandır və normalda ildə iki bala verir. Balası da bir yaşa çatandan sonra növbəti ildə bala vermək imkanına malik olur. Keçənilki tədqiqatlara görə təkcə Şirvan Milli Parkında 6500 civarında ceyran var. Ceyranın Azərbaycanda yayıldığı ərazi təkcə Şirvan Milli Parkı deyil. Tarixən bütün düzənlik bölgələri, Böyük və Kiçik Qafqazın dağətəyi ərazilərini əhatə edib. Hazırda bəzi yerlərdə ceyranların qaytarılması mümkündür. Növbəti layihə olaraq zubrların reintroduksiyası layihəsi həyata keçirildi. Bundan başqa, planda maralların, bezoar keçilərinin, köpgərin, muflonların tarixi areallarını bərpa etmək var”.
Bölmənin digər xəbərləri
