Azad olunmuş ərazilərə giriş prosedurlarının sadələşdirilməsi vətəndaşların təhlükəsizliyi nəzərə alınmaqla həyata keçirilir ŞƏRH
Bakı, 9 iyul, AZƏRTAC
Mina təhlükəsini nəzərə alaraq deyə bilərəm ki, vətəndaşların işğaldan azad edilmiş ərazilərə səfərlərinin təhlükəsiz və planlı şəkildə təşkili Azərbaycan dövlətinin bu istiqamətdə atdığı önəmli addımlardan biridir. Son zamanlar icazə mexanizmlərinin mərhələli şəkildə sadələşdirilməsi, infrastruktur imkanlarının genişləndirilməsi və texnoloji platformaların tətbiqi həm təhlükəsizlik, həm də iqtisadi fəallıq baxımından ciddi irəliləyişlərə yol açıb.
Bu fikirləri AZƏRTAC-a açıqlamasında “Qarabağın Tərəqqisi Naminə” İctimai Birliyinin sədri Şəbnəm Səfərova söyləyib.
Onun sözlərinə görə, “yolumuzqarabaga.az” portalı vasitəsilə fərdi minik avtomobilləri ilə səfərlər üçün icazə müddətinin 2 gündən 5 günədək artırılması, həmçinin otel qeydiyyatı əsasında avtomatik icazə verilməsi bu yanaşmanın praktiki ifadəsidir. Bu dəyişikliklər ziyarətçilər üçün əlçatanlığı artırmaqla yanaşı, regionda uzunmüddətli qalma imkanları və xidmət sektorunun inkişafı üçün də əlverişli şərait yaradır. Artıq icazə müddətinin 5 günədək artırılması və avtomatik mexanizmin tətbiqi bölgədə daha uzunmüddətli qalmağı mümkün edir ki, bu da yerli turizm sektorunun və sahibkarlığın inkişafına əlavə stimul verir. Eyni zamanda, bu dəyişikliklər bölgədə yerləşmə və turizm infrastrukturu layihələrinin planlaşdırılmasına dəstək olmaqla, regionun iqtisadi potensialını genişləndirir.
“Təəssüf ki, bu ərazilər uzun illər işğalda olub və ərazilər minalarla çirkəndirilib. Birdən-birə böyük insan axını təhlükəli zonalara nəzarəti çətinləşdirə bilərdi. Mərhələli sadələşmə isə zəruri təhlükəsizlik nəzarətinin qorunmasına imkan verir. Statistik məlumatlara əsasən, müharibədən sonrakı dövrdə mina partlayışları nəticəsində 400-ə yaxın vətəndaş xəsarət alıb və ya həlak olub ki, bu fakt da özlüyündə təhlükəsizlik nəzarətinin və marşrut planlamasının əhəmiyyətini bir daha təsdiqləyir. Mərhələli şəkildə tətbiq olunan icazə mexanizmi səyahət edən şəxslərin təhlükəsiz və monitorinqə açıq marşrutlardan istifadə etməsinə şərait yaradır, eyni zamanda, ərazilərə giriş-çıxışın dövlət strukturları tərəfindən effektiv idarə olunmasına imkan verir. Bu baxımdan, əraziyə giriş prosedurlarının mərhələli şəkildə sadələşdirilməsi sadəcə təhlükəsizlik baxımından deyil, həm də mövcud infrastrukturun real imkanlarına uyğun planlama baxımından səmərəli yanaşmadır”, - deyə Ş.Səfərova əlavə edib.
QHT rəhbəri bildirib ki, beynəlxalq təcrübə də Azərbaycanın bu yanaşmasının nə qədər məntiqli və optimal olduğunu təsdiqləyir: “Dünyanın digər postmünaqişə bölgələrinin təcrübəsi ilə müqayisədə Azərbaycanın tətbiq etdiyi model təhlükəsizlik və idarəetmə baxımından müasir rəqəmsal texnologiyaların istifadəsi ilə fərqlənir. Məsələn, Balkan ölkələrində, xüsusilə Bosniya və Herseqovinada, Xorvatiyada mina təhlükəsi hələ də tam aradan qalxmadığından ziyarətçilər üçün açıq sahələr xüsusi nişanlanır, məhdud marşrutlar təklif olunur, mobil xəbərdarlıq sistemləri tətbiq edilir. Kolumbiyada uzunmüddətli daxili münaqişədən sonra təhlükəsiz turizm marşrutlarının dövlət nəzarətində mərhələli açılması təcrübəsindən istifadə olunur. Bu nümunələr göstərir ki, mərhələli icazə, təhlükəsizlik marşrutları və məhdudlaşdırılmış giriş postmünaqişə dövrü idarəetməsinin əsas elementləridir”.
Onun fikrincə, Azərbaycanın üstünlüyü ondan ibarətdir ki, icazə prosesi tam rəqəmsallaşdırılıb və real vaxt rejimində mərkəzləşdirilmiş şəkildə idarə olunur. “Yolumuzqarabaga.az” portalı səfər planlamasını, təhlükəsizlik marşrutlarının monitorinqini və giriş icazələrinin rəsmiləşdirilməsini vahid platformada birləşdirir. Otellərdə qeydiyyat əsasında icazənin avtomatik verilməsi prosesi sadələşdirir, sahibkarlıq subyektlərinin fəaliyyətini stimullaşdırır və ziyarətçilər üçün çevik model yaradır.
“Nəticə etibarilə, Qarabağ və Şərqi Zəngəzura giriş prosedurlarının mərhələli şəkildə asanlaşdırılması regionun turizm potensialının səmərəli reallaşdırılmasına, təhlükəsizlik tələblərinə riayət edilməklə iqtisadi fəallığın və məşğulluğun artmasına, yeni xidmət sahələrinin formalaşmasına və yerli sahibkarlığın inkişafına dəstək verir. Eyni zamanda, bu mexanizm əhaliyə mina təhlükəsi ilə bağlı davamlı maarifləndirmə və səfərlərin monitorinqini daha effektiv şəkildə təşkil etməyə imkan yaradır. Bu model mövcud praktikaya əsaslanaraq, gələcəkdə dünyanın digər postmünaqişə ərazilərində də tətbiq oluna biləcək ən optimal və dayanıqlı idarəetmə yanaşmalarından biridir”, - deyə Şəbnəm Səfərova vurğulayıb.
Bölmənin digər xəbərləri
