Azərbaycan–ABŞ münasibətlərində yeni dövr: Strateji Tərəfdaşlıq Xartiyası nə vəd edir? ŞƏRH
Bakı, 11 fevral, AZƏRTAC
Azərbaycan–ABŞ münasibətləri müstəqillik dövründən etibarən formalaşaraq zamanla strateji məzmun qazanıb. İki ölkə arasında əməkdaşlıq bəzən fərqli siyasi baxışlar səbəbindən çətin mərhələlərdən keçsə də, ümumi xətt üzrə dialoq və qarşılıqlı maraqlar qorunub saxlanılıb. Azərbaycanın ABŞ-la təhlükəsizlik sahəsində əməkdaşlığı xüsusilə 11 sentyabr hadisələrindən sonra daha da intensivləşib. Bu iştirak Azərbaycanın beynəlxalq təhlükəsizlik sisteminə töhfəsi kimi qiymətləndirilib və Vaşinqton tərəfindən müsbət qarşılanıb. Bununla yanaşı, enerji layihələri, xüsusilə Xəzər resurslarının Qərbə nəqli iki ölkə arasında strateji tərəfdaşlığın iqtisadi əsasını gücləndirib.
Bu sözləri AZƏRTAC-a açıqlamasında siyasi şərhçi Emin Bağırov deyib.
O bildirib ki, son dövrlərdə Azərbaycan–ABŞ münasibətlərində ciddi yüksəliş müşahidə olunur. Xüsusilə Prezident Trampın vasitəçiliyi ilə regionda sülh prosesinə verilən dəstək iki ölkə arasında münasibətlərin daha səmimi və konstruktiv məcraya keçməsinə səbəb olub. Bu təşəbbüslər qarşılıqlı etimadı artırmaqla yanaşı, siyasi dialoqun yeni mərhələyə qədəm qoyduğunu göstərir. Bu baxımdan ABŞ-ın Vitse-prezidenti Cey. Di. Vensin Azərbaycana səfəri xüsusi əhəmiyyət daşıyır.
Emin Bağırovun sözlərinə görə, səfər çərçivəsində keçirilən görüşlərdə təhlükəsizlik, enerji əməkdaşlığı, regional sülh prosesi və iqtisadi əlaqələrin genişləndirilməsi əsas müzakirə mövzu idi: “Xüsusilə Cənubi Qafqazda uzunmüddətli sabitliyin təmin olunması məsələsi diqqət mərkəzində dayanırdı. Strateji Tərəfdaşlıq Xartiyasının imzalanması iki ölkə arasında strateji əməkdaşlığın yeni mərhələyə qədəm qoymasının və təhlükəsizlik, enerji, iqtisadiyyat və regional sabitlik sahələrində qarşılıqlı əməkdaşlığın genişləndirilməsinin anonsu oldu. Keçirilən görüşlərdə Prezident İlham Əliyevin səsləndirdiyi fikirlər və bəyanatlar mühüm məqamlarla yadda qaldı. Dövlətimizin başçısı qeyd etdi ki, TRIPP layihəsi regionda sülhün və əməkdaşlığın inkişafına əhəmiyyətli töhfə verəcək. Bununla yanaşı, Azərbaycan lideri müdafiə sahəsində yeni əməkdaşlıq imkanlarının açıldığını və süni intellekt mərkəzlərinin yaradılmasının ikitərəfli gündəliyin mühüm hissəsi olduğunu, həmçinin ABŞ-ın aparıcı şirkətləri ilə artıq ilkin nəticələrin əldə olunduğunu diqqətə çatdırdı. ABŞ-ın Vitse-prezidentinin səfəri və Xartiyanın imzalanması isə Azərbaycan–ABŞ münasibətlərinin tamamilə yeni mərhələyə qədəm qoymasını və qarşılıqlı əməkdaşlığın strateji səviyyəyə yüksəlməsini nümayiş etdirdi”.
Siyasi şərhçi qeyd edib ki, Vitse-prezidentin Bakıda verdiyi mesajlar olduqca əhəmiyyətli idi. Birincisi, ABŞ regionda balanslaşdırılmış siyasət yürütmək niyyətini nümayiş etdirdi. İkincisi, Azərbaycanla təhlükəsizlik əməkdaşlığının davam etdiriləcəyi vurğulandı. Üçüncüsü isə enerji və nəqliyyat layihələrinin qlobal əhəmiyyəti yenidən diqqətə çatdırıldı. Səfərin digər mühüm tərəfi dialoqun institusional çərçivəyə salınması idi. Yüksəksəviyyəli görüşlər münasibətlərin konkret mexanizmlərlə inkişaf etdirilməsi niyyətini ortaya qoydu və gələcək əməkdaşlıq üçün yeni mərhələnin başlanğıcı kimi tarixə düşdü.
Emin Bağırov diqqətə çatdırıb ki, Azərbaycan–ABŞ münasibətləri artıq çoxşaxəli və strateji səviyyəyə yüksəlib. Bu əlaqələr sülh, təhlükəsizlik, texnologiya, iqtisadi əməkdaşlıq və diplomatiya sahələrində bir-birini tamamlayır, qarşılıqlı etimad və faydalı əməkdaşlığın yeni mərhələsini təsdiqləyir. Azərbaycanın effektli xarici siyasət kursu və Prezident İlham Əliyevin liderliyi ölkəmizi beynəlxalq münasibətlərdə vacib tərəfdaş kimi mövqeləndirib, regionda və qlobal miqyasda nüfuzunu artırıb. Birləşmiş Ştatların Vitse-prezidentinin ölkəmizə səfəri də məhz bu strateji əməkdaşlığın və qarşılıqlı etimadın təzahürü kimi yadda qaldı. Səfər çərçivəsində aparılan yüksəksəviyyəli görüşlər, Strateji Tərəfdaşlıq Xartiyasının imzalanması və qarşılıqlı əməkdaşlıq istiqamətlərində əldə olunan uğurlar Azərbaycan–ABŞ münasibətlərinin real, konkret nəticələrə söykənən strateji tərəfdaşlığa çevrildiyini göstərdi.
Bölmənin digər xəbərləri
