Azərbaycan dövlətinin müdaxiləsindən sonra Gürcüstan ərazisində saxlanılan azərbaycanlı sürücülərin problemləri həllini tapıb
Tbilisi, 27 noyabr, AZƏRTAC
Son günlər Azərbaycandan gələn yük maşınlarının Gürcüstan ərazisində qanunsuz saxlanılması barədə məlumatlar yayılır. Bəzi məlumatlara görə, hətta onların bəziləri 40 gündən çoxdur ki Gömrük Rəsmiləşdirilməsi idarələrində gözləyir. Saxlanılan avtomobillərin içərisində Gürcüstan ərazisindən tranzit kimi istifadə edənlər də var.
AZƏRTAC-ın Gürcüstan üzrə xüsusi müxbiri məsələ ilə bağlı Azərbaycanın Gürcüstandakı səfirliyi, Gürcüstan Dövlət Müəssisəsinin Gəlirlər Xidmətinin İctimaiyyətlə Əlaqələr və Marketinq Departamenti ilə əlaqə saxlayıb və bəzi sürücülərlə görüşüb, onların problemləri ilə maraqlanıb.
Səfirlikdən bildirilib ki, Azərbaycandan Avropaya tütün məmulatları aparan 3 yük maşını Gürcüstan ərazisində müəyyən qayda pozuntularına görə saxlanılıb. Səfirlik bu və digər faktlarla əlaqədar olaraq Gürcüstanın müvafiq dövlət orqanları ilə əlaqə saxlayıb. Müəyyən danışıqlardan sonra bu və digər səbəblərdən saxlanılan sürücülərin və avtomobillərin Gürcüstan sərhədindən keçərək təyinat nöqtəsinə getmələri artıq təmin olunur.
Gürcüstan Dövlət Müəssisəsinin Gəlirlər Xidmətinin İctimaiyyətlə Əlaqələr və Marketinq Departamentinin rəhbəri Tamar Andriadze isə bildirib ki, gömrük xidməti tam həcmdə və fasiləsiz fəaliyyət göstərir və bütün avtomobillərə standart prosedurlar tətbiq olunur: “Azərbaycan dövlət nömrə nişanlı maşınlar da eyni prosedurlardan keçir. Standart prosedurlar bitdikdən sonra bütün bu avtomobillər təyinat yerlərinə göndəriləcək. Artıq bu avtomobillərlə bağlı heç bir problem mövcud deyil. Departament rəhbəri əlavə edib ki, sürücülərin bəzi hallarda problemləri sənədləşmə və ya digər gömrük prosedurları ilə bağlı ola bilər.
"Mən konkret halda nəyin baş verdiyini deyə bilmərəm, amma ümumi olaraq bütün maşınlar, o cümlədən Azərbaycan dövlət nömrə nişanlı avtomobillər standart prosedurlardan keçir”, – deyə T.Andriadze bildirib.
Tbilisidəki Gömrük Rəsmiləşdirilməsi İdarəsində 42 gündür dayanan sürücü Sərdar Səmədov deyib ki, bu günə qədər burada gözləməsinin səbəbini ona dəqiq deyən yoxdur.
“Mən 10 ildir beynəlxalq yükdaşımaları ilə məşğulam. Hər zaman da demək olar ki, eyni yük daşıyıram və hər zaman da sənədlərim qaydasında olub. Müxtəlif dövrlərdə xırda problemlər yaşasam da, bu dəfə bizi həddindən çox saxlayıblar. Guya daşıdığım yükün - kremin tərkibində gümüş maddəsi var və bu da dövlət laboratoriyasında yoxlanılmalıdır. Azərbaycandan yenidən müvafiq sənəd gətiriblər, amma buna baxmayaraq, 42 gündür daşıdığım mallardan analiz üçün heç bir nümunə götürülmür və yoxlama aparılmır”, – deyə sürücü bildirib.
S.Səmədov Gürcüstan gömrük işçiləri və ya Dövlət Yol Polisi əməkdaşları tərəfindən hər hansı bir təzyiq və təhqirlə üzləşmədiyini bildirib.
Digər yük maşınının sürücüsü Pərvin Həsənov isə Azərbaycandan Yunanıstana xam tütün məhsulu daşıyır. O isə 21 gündür Tbilisidə gözləyir. Gözləməsinin səbəbi barədə ona heç bir məlumat verilmir: “Mən tranzit yükü daşıyıram, tranzit yükünün isə bu qədər saxlanılması beynəlxalq qanunlara ziddir. Artıq Avropadakı müştərilərimiz də narazılıq edirlər və bizimlə işləmək istəmirlər”.
Pərvin Həsənovun sözlərin görə, gömrük xidməti əməkdaşları əvvəl onlarla kobud rəftar edirdilər. Azərbaycanın Gürcüstandakı səfirliyinin məsələyə müdaxiləsindən sonra polis və gömrük əməkdaşlarının azərbaycanlı sürücülərə münasibəti dəyişib.
Tranzit yükdaşıması ilə məşğul olan digər sürücü Nizaməddin Mirzəyev də 20 gündür Tbilisi Gömrük Rəsmiləşdirilməsi İdarəsindədir. Ona da yükün saxlanılmasının səbəbi barədə məlumat verilmir.
“Mən 5 ildir ki beynəlxalq yükdaşıma ilə məşğulam. İndi də Poti limanından Litvaya minik avtomobili aparıram. İlk dəfədir ki, belə bir problem yaşayıram. Gömrük və dövlət yol polisi əməkdaşları azərbaycanlı sürücülərlə kobud rəftar edirlər. Səbəbini soruşanda isə daha əsəbi və sərt mövqe nümayiş etdirirlər.
Gömrük ərazisində saxlanılan digər sürücü Fərqani Vüsal Fəxrəddin oğlu da eyni problemi yaşayır: “Artıq bir neçə gündür buradayam, saxlanılmağımın səbəbi isə gömrük bəyannaməsinin guya düzgün doldurulmamasıdır. Biz bu sənədi hər dəfə necə lazımdırsa, yəni qanunun tələbinə uyğun tərtib edirik. Bu dəfə hansı səbəbdən və sənəddəki yanlışlığın nədən ibarət olması barədə məlumat verilmir. Sadəcə olaraq, “gözləyin, sənədlərinizə baxılır və sizə məlumat veriləcək” deyib bizi qapıdan uzaqlaşdırırlar”, – deyə sürücü vurğulayıb.
Qeyd edək ki, azərbaycanlı sürücülər son günlər eyni problemi Batumidə də yaşayırlar. Saxlanılan sürücülərdən Balay Allahverdiyev deyir ki, son bir ay ərzində 70-dən çox yük maşını saxlanılıb və bəziləri hətta geri qaytarılır. Bəzi sürücülərin isə pasportları alınıb və geri qaytarılmır. Heç bir səbəb göstərilmir.
O deyib: “Sürücülərimiz tam anlaşılmazlıq içərisindədirlər. Gömrük əməkdaşlarına yaxınlaşıb “biz tranzit yükü daşıyırıq, indi nə edək, necə edək?” deyəndə isə bizə “gedin TRIPP dəhlizindən keçin” deyirlər”.
Məlumat üçün bildirək ki, Azərbaycanın Gürcüstandakı səfirliyinin müdaxiləsindən sonra həm Tbilisidə, həm də Batumidəki gömrük rəsmiləşdirilməsi idarələrindən xeyli yük avtomobili öz marşrutları üzrə yola salınıblar. Sürücülər bu köməyə, dəstəyə və qayğıya görə Azərbaycan dövlətinə minnətdarlıq edirlər.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
