“Azərbaycan guşəsi” Kişineudakı XII etnomədəniyyət festivalında çox böyük maraq doğurmuşdur
Kişineu, 19 sentyabr (AZƏRTAC). Moldova paytaxtının Ştefan çel Mare adına mərkəzi parkında “Rəngarənglik vasitəsilə birlik” şüarı altında ənənəvi XII etnomədəniyyət festivalı keçirilmişdir.
Festivalda bu ölkədə yaşayan təqribən 48 etnik birliyin nümayəndələri iştirak etmişlər. Festivalın əsas məqsədi Moldovada yaşayan milli azlıqların özünəməxsus xüsusiyyətləri ilə tanış olmaq, mədəniyyətlərarası dialoqu inkişaf etdirmək, habelə xalqlar arasında dostluq münasibətlərini möhkəmləndirməkdir.
Bayram tədbirləri səhər Moldova Prezidenti Nikolae Timofti, parlamentin sədri Marian Lupu, Baş nazir Vlad Filat, hökumət üzvləri və parlamentin deputatları, Kişineunun meri Dorin Kirtoake, diplomatik korpusun rəhbərləri, Moldovada yaşayan diasporların və milli azlıqların üzvləri, habelə KİV nümayəndələri tərəfindən Moldova hökmdarı Ştefan çel Marenin abidəsi önünə təzə-tər çiçəklərin qoyulması ilə başlanmışdır.
Ölkənin ali rəhbərliyi mərkəzi parkın müxtəlif guşələrində yerləşən sərgilərə növbə ilə baxmış, Moldovada yaşayan xalqların və millətlərin tarixi, mədəniyyəti, ənənələri və nailiyyətləri ilə tanış olmuş, habelə kitab sərgisinə və s. tamaşa etmişdir.
Festivalın iştirakçıları, həmçinin müxtəlif millətlərin xalq yaradıcılığı ustalarının işləri, milli yeməkləri, mahnı və rəqsləri ilə də həvəslə tanış olmuşlar.
Azərbaycanın Moldovadakı səfirliyi və Moldova Azərbaycanlıları Konqresi (MAK) tərəfindən təşkil edilmiş sərgi ən sanballı və yaddaqalan olmuşdur. Gün ərzində “Azərbaycan guşəsinə” Moldova Prezidenti, parlamentin spikeri, hökumət başçıları və Kişineunun meri gəlmişlər. Onlar Azərbaycan sərgisi ilə böyük maraqla tanış olmuş və milli mətbəximizin yeməklərindən dadmışlar.
Azərbaycan sərgisinə Moldovanın ictimai xadimləri, səfirliklərin və beynəlxalq təşkilatların missiyalarının başçıları, KİV nümayəndələri də tamaşa etmişlər. “Azərbaycan guşəsində” milli geyimlər, xalçalar və xalça məmulatları, qədim mis qablar və milli musiqi alətləri nümayiş etdirilmişdir.
Bütün gün MAK gənclər təşkilatının rəqs qrupu saysız-hesabsız tamaşaçıları öz əlvan proqramı ilə sevindirmişdir.
Azərbaycanın Moldovadakı səfiri Namiq Əliyev və MAK-ın sədri Vüqar Novruzov qonaqları qarşılayıb sərgi ilə tanış etmişlər. Qonaqlara Azərbaycan haqqında müxtəlif kitablar və jurnallar da təqdim edilmişdir.
Moldova KİV-ləri sərgini geniş işıqlandırmışdır, ölkənin müxtəlif telekanallarında festivalla bağlı süjetlər göstərilmişdir.
Zeynal Ağazadə
AZƏRTAC-ın xüsusi müxbiri
Kişineu
Bölmənin digər xəbərləri
