Azərbaycan mürəkkəb geosiyasi şəraitdə davamlı iqtisadi inkişafını qoruyur ŞƏRH
Bakı, 30 iyun, AZƏRTAC
Azərbaycan həm ərazi xüsusiyyətlərinə, həm də yerləşdiyi regionun mürəkkəb geosiyasi və münaqişəli xarakterinə baxmayaraq, davamlı və yüksək iqtisadi inkişaf dinamikasına nail olub.
Bu fikirləri AZƏRTAC-a açıqlamasında politoloq Turan Rzayev deyib.
Onun sözlərinə görə, son illərdə reallaşdırılan dövlət siyasətinin prioritet istiqamətlərindən biri qeyri-neft sektorunun inkişaf etdirilməsi, dövlət büdcəsinin neft gəlirlərindən asılılığının minimuma endirilməsi və vətəndaşların məşğulluq imkanlarının genişləndirilməsidir. Bu strateji addımlar gələcəyə, o cümlədən vətəndaşların alıcılıq qabiliyyətinin yüksəldilməsinə və makroiqtisadi sabitliyin qorunmasına hesablanıb.
“Azərbaycanın iqtisadi modelində qlobal trendlərə uyğun olaraq reallaşdırılan layihələrdən biri də yaşıl enerjiyə keçid strategiyasıdır. Ənənəvi enerji resurslarının ixracı ilə yanaşı, bərpaolunan enerji mənbələrinin inkişafı ölkəmizin müasir çağırışlara çevik adaptasiya olmaq potensialını nümayiş etdirir.
Ölkəmizin innovativ idarəetmə təcrübəsi də beynəlxalq miqyasda öyrənilir. Məsələn, milli brend olan "ASAN xidmət" təcrübəsi hazırda bir çox Afrika ölkələrində, həmçinin Pakistanda uğurla tətbiq olunur. Azərbaycan həm qlobal təcrübəni mənimsəyən, həm də öz qabaqcıl modellərini digər tərəfdaş dövlətlərlə bölüşən ölkə kimi çıxış edir.
Qarabağ və Şərqi Zəngəzur iqtisadi rayonlarında aparılan genişmiqyaslı bərpa-quruculuq işləri ölkə iqtisadiyyatının əsas hərəkətverici qüvvəsinə çevrilib. Bu ərazilər daxili potensial və milli sərmayə hesabına sürətlə yenidən qurulur. "Böyük Qayıdış" Proqramı çərçivəsində vətəndaşların doğma yurdlarına köçürülməsi yalnız infrastrukturun qurulması ilə məhdudlaşmır, həm də regionun iqtisadi fəallığının təmin edilməsini və işçi qüvvəsinin cəlbini ehtiva edir”, - deyə politoloq əlavə edib.
T.Rzayev bildirib ki, ölkə iqtisadiyyatına xarici investisiyaların cəlb edilməsi məsələsi isə bilavasitə dövlət başçısının diqqət mərkəzindədir. Prezident İlham Əliyevin Münxen Təhlükəsizlik Konfransı, Antalya Diplomatik Forumu və digər mötəbər beynəlxalq platformalar çərçivəsində dünyanın aparıcı şirkət və korporasiya rəhbərləri ilə keçirdiyi görüşlər xarici sərmayənin ölkəmizə axınını stimullaşdırır. Hazırda dövlətin iqtisadi idarəetmə aparatının və hökumət üzvlərinin vahid strategiya çərçivəsində, mərkəzləşdirilmiş formatda fəaliyyəti təmin olunub.
“Müasir dünyada baş verən geosiyasi dalğalanmalar, enerji böhranları və hərbi münaqişələr qlobal miqyasda bahalaşmaya və iqtisadi risklərə yol açır. Azərbaycan bu çağırışlara qarşı preventiv addımlar ataraq, mövcud problemlərin aşkarlanması və aradan qaldırılması istiqamətində innovativ layihələr icra edir. Bu çərçivədə ərzaq təhlükəsizliyinin təmin olunması, xüsusilə taxıl ehtiyatlarının artırılması ən önəmli prioritetlərdən biridir. Dövlət başçısının tapşırıqlarına uyğun olaraq, kənd təsərrüfatı sahəsində milli istehsal modelinin yaradılması, yerli sahibkarlara dövlət dəstəyinin və subsidiyaların artırılması, eləcə də vergi güzəştlərinin tətbiqi istiqamətində məqsədyönlü tədbirlər həyata keçirilir. Prezident İlham Əliyevin prosesləri bilavasitə nəzarətdə saxlaması, problemlərin yerində müəyyənləşdirilərək operativ tapşırıqların verilməsi ölkə iqtisadiyyatının dayanıqlı inkişafının əsas təminatıdır”, - deyə o, fikrini yekunlaşdırıb.
Bölmənin digər xəbərləri
