Azərbaycan QDİƏT-in turizm üzrə işçi qrupunun iclasında təmsil olunur
Bakı, 23 iyun, AZƏRTAC
Rusiyanın Soçi şəhərində Qara Dəniz İqtisadi Əməkdaşlıq Təşkilatının (QDİƏT) mədəniyyət və turizm əməkdaşlığı üzrə işçi qrupunun birgə iclası işə başlayıb.
Sözügedən tədbirdə ölkəmizi Mədəniyyət və Turizm Nazirliyinin turizm şöbəsinin müdiri Aydın İsmiyev, həmin şöbənin böyük məsləhətçisi Cavid Abdullayev və Bakı Turizm İnformasiya Mərkəzinin direktoru Zakir Əliyev təmsil edirlər.
Nazirlikdən AZƏRTAC-a bildirilib ki, tədbir çərçivəsində keçirilən görüşlərdə QDİƏT-ə üzv ölkələrdə davamlı turizm sahəsində ən yaxşı təcrübələrin tətbiqi, təşkil edilən turizm tədbirləri və sərgilərində qarşılıqlı iştirak, turizmin xüsusi növləri üzrə əməkdaşlığın qurulması və bir sıra digər mühüm məsələlər müzakirə edilib, mədəniyyət və turizm nazirlərinin konfransı üçün müvafiq gündəlik təsdiq olunub.
Qeyd edək ki, QDİƏT-ə üzv dövlətlərin mədəniyyət və turizm nazirlərinin konfransı bu gün Soçidə keçiriləcək.
Bölmənin digər xəbərləri
