İQTİSADİYYAT
Azərbaycan Qlobal Geotermal Alyansa üzv seçilib
![Azərbaycan Qlobal Geotermal Alyansa üzv seçilib](/files/2023/2/1200x630/1692344892565245104_1200x630.jpg)
Bakı, 18 avqust, AZƏRTAC
Azərbaycan Respublikası Prezidentinin müvafiq Sərəncamı ilə təsdiq edilmiş “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın Tədbirlər planında “Bioenerji və geotermal enerjidən istifadə imkanlarının genişləndirilməsi” və işğaldan azad edilmiş ərazilərində “yaşıl enerji” zonasının yaradılması tapşırığının icrası üçün geotermal enerji sahəsində beynəlxalq təşkilatlarla əməkdaşlıq əlaqələrinin genişləndirilməsi və geotermal enerjidən istifadə sahəsində qabaqcıl dünya təcrübəsinin öyrənilməsi məqsədilə Beynəlxalq Bərpa Olunan Enerji Agentliyinin (IRENA) idarəçiliyi ilə fəaliyyət göstərən Qlobal Geotermal Alyansa (Global Geotermal Alliance) üzvlük üçün müraciət edilib və Azərbaycan Alyansın üzvü seçilib.
AZƏRTAC IRENA-nın məlumatına istinadən xəbər verir ki, Alyans 2015-ci ilin dekabrında Parisdə keçirilən BMT-nin İqlim Dəyişikliyi üzrə Tərəflərin 21-ci Konfransında (COP21) fəaliyyətə başlayıb və geotermal enerjidən istifadənin genişləndirilməsi üzrə sahibkarlar, hökumət orqanları, investorlar və digər maraqlı tərəflər üçün platforma rolunu oynayır. Təşkilat geotermal enerjidən elektrik enerjisinin istehsalı və birbaşa istifadənin artırılması sahəsində fəaliyyət göstərir.
Qlobal Geotermal Alyansı 55 üzv ölkə və 59 tərəfdaş qurumdan ibarət təşkilatdır.