AZƏRBAYCAN–TÜRKİYƏ MÜNASİBƏTLƏRİ DAHA DA MÖHKƏMLƏNƏCƏKDİR
AZƏRTAC-ın müxbiri xəbər verir ki, Vilayət Quliyev türkiyəli həmkarını səmimi salamlamış və dəvətini qəbul edib Azərbaycana səfər etdiyi üçün ona minnətdarlığını bildirmişdir.
Nazir Vilayət Quliyev demişdir: “Siz Bakıya ölkəmiz üçün ağrılı olan bir dövrdə gəlmisiniz. Azərbaycan xalqı, bütün türk dünyası Heydər Əliyevin simasında öz böyük oğlunu, müdrik dövlət xadimini itirmişdir. Bu ağır günümüzdə biz yenə də Türkiyəni öz yanımızda gördük. Qardaş ölkənin dövlət və hökumət başçıları, tanınmış siyasətçilər, iş adamları Prezident Heydər Əliyevin son mənzilə yola salınması mərasimində iştirak etmişlər. Bu gün siz də şəhidlərlə bir sırada duran Prezident Heydər Əliyevin məzarını ziyarət etmisiniz. Bizə göstərdiyiniz diqqət üçün sizlərə bir daha minnətdarlığımızı bildiririk.
Azərbaycan tarixinin müasir dövrü Heydər Əliyevin adı və fəaliyyəti ilə sıx bağlıdır. O, haqlı olaraq müasir Azərbaycanın qurucusu hesab olunur. 1993-cü ildə yenidən hakimiyyətə gələn Heydər Əliyev Azərbaycanı xaosdan, parçalanmadan xilas edərək, güclü, dinamik inkişafda olan bir dövlətə, türk dünyasının ayrılmaz hissəsinə çevirmiş, eləcə də bütün dünyaya tanıtmışdır. Azərbaycanda türkçülük duyğusunun güclənməsində, Türkiyə və digər ölkələrlə münasibətlərin inkişafında mühüm rol oynamışdır. Əlbəttə, biz kifayət qədər yetkin insanlarıq, bilirik ki, dünyada heç bir şey, o cümlədən insan ömrü əbədi deyil. Ona görə də biz bu böyük kədəri yaşamaqla yanaşı, gələcəyə də ümidlə baxırıq və inanırıq ki, Azərbaycan məhz Heydər Əliyevin qoyduğu yolla irəli gedəcək, Türkiyəni də hər zaman olduğu kimi, yenə də öz yanında görəcəkdir. Biz bundan sonra da münasibətlərimizin daha da inkişaf etdirilməsi və əlaqələrimizin dərinləşməsi, xalqımızın rifah halının yaxşılaşması, mövcud problemlərimizin birgə həlli üçün səylərimizi artırmalıyıq. Türkiyə-Azərbaycan qardaşlığı yaşamalıdır və yaşayacaqdır”.
Abdullah Gül azərbaycanlı həmkarına onu Bakıya səfərə dəvət etdiyinə və səmimi qəbula görə minnətdarlıq etmişdir.
Türkiyənin xarici işlər naziri demişdir: “Xarici ölkələrin birində səfərdə olduğum üçün bütün türk dünyasının önəm verdiyi dövlət və siyasət xadimi möhtərəm Heydər Əliyevin dəfn mərasimində iştirak edə bilməmişdim. Bu gün onun məzarını ziyarət etdim, ruhuna dua oxudum, Allahdan rəhmət dilədim. Azərbaycan xalqına və bütün türk dünyasına bir də başsağlığı verirəm, sizin kədərinizi bölüşürəm. Heydər Əliyev ölkələrimizin yaxınlaşması üçün çox böyük işlər gördü. Onun xidmətləri unudulmamalıdır. Heydər Əliyev qəlbimizdə böyük izlər qoydu. Onun yolu davam etdirilməlidir. Türk xalqları qardaş və dostdurlar. Bu qardaşlığımız, dostluğumuz daha da inkişaf etməli, dərinləşməlidir. Biz bunun üçün əlimizdən gələni etməli və daha səmərəli çalışmalıyıq. Səfərimin əsas məqsədi də bu barədə məsləhətləşmələr aparmaqdır. Türkiyə həmişə olduğu kimi, yenə də Azərbaycanladır və bu yoldan dönməyəcəkdir”.
Sonra görüşdə Azərbaycan və Türkiyə arasında siyasi, iqtisadi, mədəni və digər sahələrdə əlaqələrin daha da inkişaf etdirilməsi və qarşılıqlı maraq doğuran digər məsələlər ətrafında fikir mübadiləsi aparılmışdır.
Bölmənin digər xəbərləri
