Azərbaycan və Rusiya ekspertləri erməni tərəfinin qeyri-konstruktiv ritorikasının nəticələrindən danışıblar
Bakı, 24 iyul, N.Məmmədova, AZƏRTAC
Ermənistanın ifadə etdiyi sözlər konkret əməllərə keçərsə, erməni tərəfi həqiqətən də müharibəyə hazırlaşarsa və sərhəddə, həmçinin Rusiya sülhməramlılarının müvəqqəti yerləşdiyi zonada yeni hərbi təxribatlar törədərsə, o zaman münaqişə vəziyyətinin yaranacağını istisna etmək olmaz. Biz bunu istəmirik, lakin buna hazırıq.
Bu barədə AZƏRTAC-a Bakıdan səslənən bəyanatlara zidd olaraq, bu yaxınlarda Ermənistanın baş naziri Nikol Paşinyanın verdiyi təxribat xarakterli bəyanatı şərh edən politoloq İlqar Vəlizadə söyləyib. Xatırladaq ki, erməni lider Fransanın AFP agentliyinə bu günlərdə verdiyi müsahibədə yeni müharibə ehtimalı haqqında danışıb. Halbuki Azərbaycan Prezidenti İlham Əliyev cümə günü Şuşa Qlobal Media Forumunda Ermənistanın ölkəmizə qarşı ərazi iddialarından əl çəkəcəyi təqdirdə cari ilin sonunadək sülh sazişinin imzalanacağı ehtimalından bəhs edib.
Agentliyin həmsöhbəti qeyd edib: “Bakı bizim regionda baş verən real prosesləri əsas götürür və çalışır ki, diqqəti keçmişdən miras qalmış məsələlərin həllində cəmləşdirsin. Bu səbəbdən konstruktiv mövqedən çıxış edən Azərbaycan tərəfi Ermənistana münasibətlərin normallaşması üzrə səyləri davam etdirməyi təklif edir. Danışıqlar prosesinin vasitəçiləri tərəfindən də Bakının hərəkətlərinə diqqətlə yanaşılmalıdır. Onlar da regional şəraitin normallaşdırılmasında maraqlıdır. Ermənistan isə populizmlə məşğul olur. Təəssüf ki, erməni siyasi rəhbərliyi özünü küçədə olduğu kimi aparır, hər cür ziddiyyətli, çox vaxt təhrikedici bəyanatlarla çıxış edir ki, bu da regionda vəziyyətin gərginləşməsinə səbəb olur və aşkar şəkildə irəliləyən danışıqlar prosesinin dinamikasını əngəlləyir”.
Onun sözlərinə görə, Azərbaycan tərəfi yeni münaqişədə maraqlı deyil və gündəlikdə duran mürəkkəb məsələlərin həlli istiqamətində bütün zəruri siyasi-diplomatik səyləri göstərir.
Ekspert sonda qeyd edib: “Məsələlərin mahiyyətinə vardıqda, açıq-aşkar görmək olar ki, Azərbaycan şübhəsiz ki, həll olunmamış problemləri hərbi-siyasi yollarla öz xeyrinə həll etmək üçün bütün imkanlara malikdir. Lakin mümkün olan humanitar nəticələri, ondan başqa, həm Ermənistanla, həm də Azərbaycanın Qarabağ iqtisadi regionunun erməni sakinləri ilə konstruktiv dialoqu nəzərə aldıqda, bu yaxınlarda Prezident İlham Əliyevin də qeyd etdiyi kimi, Bakı bütün mümkün dialoq mexanizmlərindən və vəziyyətin nizamlanması üçün platformalardan istifadə olunmasında israrlıdır. Azərbaycanın və Ermənistanın mövqelərində olan belə ziddiyyətlər həll olunmamış məsələlərin həllinə kömək etmir. Ermənistanın ifadə etdiyi sözlər konkret əməllərə keçərsə, erməni tərəfi həqiqətən də müharibəyə hazırlaşarsa və sərhəddə, həmçinin Rusiya sülhməramlılarının müvəqqəti yerləşdiyi zonada yeni hərbi təxribatlar törədərsə, o zaman münaqişə vəziyyətinin yaranacağını istisna etmək olmaz. Biz bunu istəmirik, lakin buna hazırıq. Çünki Azərbaycan Ordusu kifayət qədər güclüdür. Yenə də dövlət başçısının sözlərinə istinad edərək söyləmək olar ki, 44 günlük Vətən müharibəsinin başa çatmasından sonra Azərbaycan Silahlı Qüvvələrinin real potensialı və gücü yalnız artıb. Əgər erməni tərəfi yaranmış real vəziyyətdən nəticə çıxarmasa, söz oyununu davam etdirsə və Azərbaycan Ordusunun gücünü sınamağa cəhd etsə, onda adekvat cavab olacaq və bu halda bütün məsuliyyət Ermənistanın üzərinə düşəcək”.
“Bakı həmişə düşünülmüş diplomatik və gözləmə mövqeyi tutur”. Bu fikirləri isə rusiyalı politoloq, millətlərarası münaqişələr və təhlükəsizlik məsələləri üzrə ekspert Yevgeni Mixaylov söyləyib.
Politoloq qeyd edib: “Zənnimcə, hazırda baş verənlər teatr səhnəsini xatırladır: böyük olan kiçik kəmağılın düzgün qərar qəbul edəcəyini gözləyir. Əgər səhvə yol verərsə, onun özü təqsirkardır. Son üç ildə baş verənlər məhz bundan ibarətdir. İrəvana şans verilib ki, nəhayət, öz xalqının və dövlətinin daha optimal inkişaf yolunu seçə bilsin. Paşinyan son yarım il ərzində beynəlxalq danışıqlar platformalarında düzgün tezislər səsləndirməyə başladı. Brüsseldə Azərbaycanın ərazi bütövlüyünü tanıdığını bəyan etdi, lakin digər platformalarda öz fikirlərinin ziddinə getdi. Bu məqamda V.İ.Leninin kitabının adını xatırlayırsan: “Bir addım irəli, iki addım geri”. İrəvanın siyasəti də məhz bu “rəqsə” bənzəyir, onun davam etdiriləcəyi təqdirdə yeni və sürətlə başa çatacaq münaqişə baş verə bilər. Axı, heç kimə sirr deyil ki, Bakı dövlətlər arasında hələ də qalmış problemləri hərbi-diplomatik zərbə ilə sürətlə həll etmək qabiliyyətinə malikdir”.
Bu ilin sonunadək sülh sazişinin imzalanması ehtimalına gəldikdə, Y.Mixaylov buna əks təsir edəcək amilləri qeyd edib. O vurğulayıb: “Mən bunu çox istəyirəm, ancaq bir çox şübhəli amillər var ki, onlar sülh sazişinin əleyhinə işləyir. Başlıcası isə yüksək siyasi gərginlik və Ermənistan rəhbərliyində müstəqilliyin olmamasıdır”.
Bölmənin digər xəbərləri
