AZƏRBAYCAN VƏ TÜRK DİASPOR NÜMAYƏNDƏLƏRİ BERLİNDƏ GÖRÜŞƏCƏKLƏR
Bakı, 30 iyun (AZƏRTAC). İyulun 1-də Berlində yerləşən Almaniyadakı Azərbaycanlıların Koordinasiya Mərkəzində Azərbaycan və türk diaspor nümayəndələrinin iştirakı ilə “dəyirmi masa” keçiriləcəkdir. Tədbirdə Azərbaycanın Almaniyadakı səfiri Pərviz Şahbazov da iştirak edəcəkdir.
AAKM-nin icraçı direktoru Samirə Patser-İsmayılova Diasporla İş üzrə Dövlət Komitəsinə bildirmişdir ki, görüşün keçirilməsinin əsas məqsədi Berlindəki türk diaspor təşkilatlarını AAKM-nin fəaliyyəti ilə tanış etmək, əməkdaşlığın daha sıx və səmərəli yollarını araşdırmaqdır. “Dəyirmi masa”da türk icmalarının rəhbərlərinə AAKM haqqında ətraflı məlumat veriləcək, Azərbaycan barədə vaxtaşırı alman cəmiyyəti ilə yanaşı, türk və digər xalqların diaspor təşkilatlarına ötürülməsi yolları, türklərin və azərbaycanlıların birgə lobbiçilik fəaliyyəti müzakirə olunacaqdır.
“Dəyirmi masa”da, həmçinin Almaniyada doğulmuş, təhsil almış həm türk, həm də azərbaycanlı gənclərin sıx ünsiyyətinin təməlinin qoyulması, onların da diaspor fəaliyyətinə aktiv qoşulmaları üçün zəruri addımların atılması barədə fikir mübadiləsi aparılacaqdır. Görüşdə Avropa Azərbaycanlıları Konqresinin, Almaniya-Azərbaycan Həmrəylik Cəmiyyətinin, Berlin-Bakı Rəsm Qalereyasının, Azərbaycan Kültür Ocağının, Azərbaycan-Alman Mərkəzinin rəhbərləri, eləcə də Almaniyadakı Türk Camaatının, Türk-Alman Mərkəzinin, Atatürk Düşüncə Mərkəzinin, Türk Gənclik və İdman Mərkəzinin, türk iş adamlarının təmsilçiləri iştirak edəcəklər.
“Dəyirmi masa”ya Almaniyada təhsil alan azərbaycanlı tələbələr də dəvət olunublar.
Bölmənin digər xəbərləri
