AZƏRBAYCAN VƏ YƏHUDİ DİASPORLARI ƏMƏKDAŞLIĞI MÖHKƏMLƏNDİRİRLƏR

14.06.2006 [11:13]
Çap et
A⁺ A^-

Ukrayna Azərbaycanlıları Konqresindən (UAK) AZƏRTAC-ın müxbirinə bildirmişlər ki, bu günlərdə Kiyevda konqresin idarə heyətinin geniş iclası keçirilmişdir. Tədbirdə “Avrasiya yəhudi konqresi” Ukrayna Milli İcmalar Konqresinin prezidenti (UMİK) İosif Zisels iştirak etmişdir. İ.Zisels Avropada və dünyada nüfuzlu diaspor təşkilatına başçılıq etməklə yanaşı, Azərbaycana, xalqımıza böyük məhəbbət və rəğbət bəsləyir. O və başçılıq etdiyi konqres Azərbaycanın ərazi bütövlüyünü dəstəkləyir, erməni təcavüzünü pisləyir, beynəlxalq konfranslarda və təşkilatlarda dövlətimizin mənafeyini müdafiə edir.

İosif Samuiloviç təkcə bu il iki dəfə Bakıda olmuş, dünya azərbaycanlılarının II qurultayında qonaq kimi iştirak etmişdir. O, UAK-ın idarə heyətinin iclasında çıxış edərək, forumda iştirakını səmimiyyətlə xatırlamış, Azərbaycan xalqının ümummilli lideri Heydər Əliyevə böyük ehtiramından, Prezident İlham Əliyevin qurultaydakı çıxışından aldığı unudulmaz təəssüratından, dövlətimizin başçısının Azərbaycan diasporunu qabaqcıl, güclü, nüfuzlu görmək istəyindən danışmışdır.

İclasda UAK-ın UMİK-ə kollektiv üzv seçilməsi, habelə Dnepropetrovsk Azərbaycanlılar Liqasının UAK-a qəbul olunması barədə qərar qəbul edilmişdir.