Azərbaycan voleybol klublarının Çağırış kuboku yarışlarında ilk rəqibləri bəlli olub
Bakı, 19 iyul, AZƏRTAC
İyulun 19-da voleybol üzrə Çempionlar Liqası, CEV kuboku və Çağırış kuboku yarışlarının püşkatma mərasimi keçirilib.
AZƏRTAC Azərbaycan Voleybol Federasiyasına istinadla xəbər verir ki, Lüksemburqda baş tutan tədbirdə Azərbaycanın avrokuboklarda iştirak edən klublarının da rəqibləri bəlli olub.
Ölkəmizi qadınlar arasında Çağırış kuboku yarışlarında təmsil edəcək “Azərreyl”in ilk rəqibi Ukraynanın “Balta” klubu olub. Son ölkə çempionu 1/32 final mərhələsindən mübarizəyə başlayacaq. Cütün ilk oyunu oktyabrın 10-12-də, ikinci matç isə oktyabrın 17-19-da keçiriləcək.
Avrokuboklarda debüt edəcək kişilərdən ibarət “Xarı bülbül Şuşa” klubunun rəqibi isə “Spartak Myjava” (Slovakiya) olub. Şuşa təmsilçisi mübarizəyə 1/32 finalda start verəcək. Komandaların birinci oyunu oktyabrın 24-26-da, cavab görüşü isə oktyabrın 31-dən noyabrın 2-dək təşkil olunacaq.
Qeyd edək ki, püşkatma mərasimində ölkəmizi “Xarı bülbül Şuşa” komandasının yeni seçilmiş prezidenti Nuran Hüseynov, klubun təsisçi-direktoru və komandanın kapitanı İlqar İmamquliyev təmsil ediblər.
Bölmənin digər xəbərləri
