Azərbaycana bir sıra ölkələrdən elektron viza ilə turistlər gəlmişdir
Bakı, 16 may (AZƏRTAC). Xəbər verildiyi kimi, Azərbaycan Respublikası Prezidentinin “Azərbaycan Respublikasına gələn əcnəbilər və vətəndaşlığı olmayan şəxslərə viza rəsmiləşdirilməsi sahəsində təxirəsalınmaz tədbirlər haqqında” 2012-ci il 20 noyabr tarixli Sərəncamının icrasının təmin edilməsi məqsədi ilə martın 15-dən ölkəmizdə elektron viza sisteminin tətbiqinə başlanılmışdır.
Mədəniyyət və Turizm Nazirliyinin mətbuat xidmətindən AZƏRTAC-a bildirmişlər ki, bununla bağlı Dövlət Sərhəd Xidmətinin, Xarici İşlər Nazirliyinin, “Risk” şirkətinin və elektron viza sistemindən istifadə edən turizm şirkətlərinin nümayəndələrinin iştirakı ilə tədbir keçirilmişdir.
Tədbirdə elektron viza üçün sənədlərin qəbulu üzrə “Risk” şirkətinin nümayəndələri tərəfindən sistemin təqdimatı olmuşdur. Eyni zamanda, sistemin daha operativ, maneəsiz və mükəmməl işləməsi üçün müvafiq qurumların nümayəndələri təklif və tövsiyələrini bildirmişlər.
Elektron viza sistemi fəaliyyətə başladığı müddət ərzində Azərbaycana elektron viza ilə Polşa, Koreya Respublikası, Makedoniya, Yunanıstan, Böyük Britaniya, İtaliya, Almaniya, ABŞ və digər ölkələrdən turistlər gəlmişdir.
Bölmənin digər xəbərləri
