AZƏRBAYCANDA YENİYETMƏLƏR ARASINDA BOKS ÜZRƏ DÜNYA ÇEMPİONATI KEÇİRİLİR
YARIŞLARIN İLK GÜNÜNDƏ AZƏRBAYCAN BOKSÇUSU İRLANDİYALI RƏQİBİNƏ BÖYÜK XAL ÜSTÜNLÜYÜ İLƏ QALİB GƏLMİŞDİR
AZƏRTAC xəbər verir ki, avqustun 31-də Heydər Əliyev adına İdman-Konsert Kompleksində gənclər arasında boks üzrə 6-cı dünya çempionatının təntənəli açılış mərasimi keçirilmişdir.
Mərasimdə iştirakçı dövlətlərin idmançıları təmsil etdikləri ölkələrin bayraqları ilə meydana daxil olmuşlar. Azərbaycanın dövlət himni səslənmişdir.
Tədbirdə Beynəlxalq Həvəskar Boks Assosiasiyasının (AİBA) prezidenti Çinq-Kuo Vu çıxış edərək bildirmişdir ki, Azərbaycanda idmanın inkişafına dövlət səviyyəsində böyük diqqət və qayğı göstərilir. Belə bir mötəbər çempionatın Azərbaycanda keçirilməsinə çox şadam. Bu gün başlanan yarışlarda iştirak edən gənc boksçular AİBA-nın gələcəyidir və biz onlara böyük ümidlər bəsləyirik.
Gənclər və idman naziri Azad Rəhimov yarışda iştirak edən idmançıları və ölkəmizə gələn qonaqları salamlamışdır. Nazir ölkəmizdə bütün sahələrdə baş verən müsbət dəyişikliklərdən və idmanın inkişafından danışmışdır.
Son illər mühüm beynəlxalq yarışlara ev sahibliyi edən Azərbaycanın bütün bölgələrində tikilən yeni Olimpiya İdman Kompleksləri haqqında danışan nazir boksçularımızın çempionatda yüksək nəticələr əldə edəcəyinə əminliyini bildirmişdir.
Tədbirdə gənc ifaçılar geniş konsert proqramı ilə çıxış etmişlər.
Dünya çempionatında 40 ölkədən 201 idmançı iştirak edir. Yarışda hər bir iştirakçı dövlət bir hakimlə təmsil olunmuşdur. Azərbaycan isə çempionata ev sahibliyi etdiyindən yarışa 6 beynəlxalq dərəcəli hakimlə qoşulmuşdur.
Ölkəmizi çempionatda 13 idmançı təmsil edir.
Dünya çempionatında ilk görüş 50 kiloqram çəki dərəcəsində türkiyəli boksçu Mehmet Topcalanla Özbəkistan idmançısı Bunjodbek Maşrapov arasında keçirilmiş və bu mübarizədə Orta Asiya təmsilçisi qələbə qazanmışdır.
Eyni çəki dərəcəsində yarışan Azərbaycan boksçusu Bəxtiyar Nadirovun İrlandiya idmançısı Tyrone Makkullaqla görüşü isə həmyerlimizin böyük xal üstünlüyü ilə müşayiət olunan qələbəsi ilə başa çatmışdır.
Ümumiyyətlə, yarışların ilk günündə 22 boksçu müxtəlif çəki dərəcələrində mübarizə aparmışdır.
Çempionat sentyabırın 8-dək davam edəcəkdir.
Bölmənin digər xəbərləri
