Azərbaycanın bölgələrində ilk dəfə cüdo üzrə beynəlxalq yarış təşkil olunacaq
Bakı, 17 dekabr, Leyla Qurbanova, AZƏRTAC
Gələn il təqvimdə hələlik 44 yarışın, o cümlədən iki beynəlxalq turnirin təşkilini planlaşdırırıq. Şübhəsiz, onların sayı arta bilər. Beynəlxalq səviyyəli turnirlərdən biri - yeniyetmələr arasında Avropa kuboku gələn il may ayında Göygöldə təşkil ediləcək.
Bu sözləri AZƏRTAC-a müsahibəsində Azərbaycan Cüdo Federasiyasının (ACF) baş katibi Rəşad Rəsullu deyib.
“Onu da bildirim ki, bu, Azərbaycanın bölgələrində keçiriləcək ilk beynəlxalq rəsmi yarışdır. Buna qədər beynəlxalq turnirlər həmişə Bakıda olub. Ümid edirik ki, bu yarış yüksək səviyyədə təşkil ediləcək və ənənəvi hal alacaq”, - deyə baş katib sözlərinə əlavə edib. R.Rəsullu bildirib ki, hazırda bölgələrimizdə də idman yarışlarının təşkili üçün hər bir şərait var. Çalışacağıq ki, yerlərdə də cüdonun kütləviliyinin təmin edilməsi üçün beynəlxalq səviyyəli yarışlar təşkil edilsin.
Baş katib gələn il daxili yarışlarda yeni formatın tətbiq ediləcəyini də deyib: “Gələn il sentyabrda Bakıda ənənəvi “Böyük dəbilqə” turniri təşkil ediləcək. Eyni zamanda, daxili yarışların yeni formatda təşkilini düşünürük. Belə ki, ACF turu çərçivəsində kişilər arasında aprel, iyun, avqust aylarında 3 yarış təşkil etməyi planlaşdırırıq. Belə ki, bu yarışlarda reytinq sistemi tətbiq olunacaq. Reytinqdə birinci yeri tutacaq idmançılar Bakı “Böyük dəbilqə” turnirinə vəsiqə qazanacaqlar”.
Bölmənin digər xəbərləri
