Azərbaycanın iki startapı “Silikon Vadisi Mentorluğu” proqramında iştirak edəcək
Bakı, 3 avqust, AZƏRTAC
“Silikon Vadisi Mentorluğu” proqramı İnnovasiya və Rəqəmsal İnkişaf Agentliyinin Azərbaycandan olan startapların beynəlxalq səviyyəli mentorlar tərəfindən dəstəklənməsinə unikal imkan yaradan layihəsidir.
AZƏRTAC Agentliyə istinadla xəbər verir ki, Azərbaycanın iki startapı - “Metatesk” və “Epoint” artıq “Silikon Vadisi Mentorluğu” proqramına seçilib. Əsası Zeynal Kərimzadə tərəfindən qoyulmuş “Epoint” elektron kommersiya xidmətlərinin göstərilməsi üçün yaradılmış platformadır. “Metatesk” startapını isə Günay İmanzadə təsis edib. Startap 6-14 yaşlı uşaq və yeniyetmələr üçün müasir və interaktiv onlayn təhsil platforması kimi fəaliyyət göstərir.
Mentorluq proqramı 6 ay davam edəcək. Bu müddət ərzində mentorlar şirkət sahiblərinə xidmət və məhsulların təkmilləşdirilməsi, biznesin miqyasının artırılması, gəlirlilik, mənfəət, yeni bazarlara çıxış əldə edilməsi və müştəri cəlbi sahəsində qabaqcıl biliklər verəcəklər.
Mentorluq iki beynəlxalq səviyyəli mütəxəssis - Marvin Liao və Rik Rasmussen tərəfindən həyata keçirilir.
Qeyd edək ki, hər iki mentor texnoloji innovasiya sahəsində çoxillik beynəlxalq təcrübəyə malikdir. Marvin Liao 23 ildir texnologiya biznesindədir, vençur sahibkar və “mələk investor” kimi dünya üzrə 465 startapa yatırım edib, 20-dən çox akselerasiya proqramına mentorluğu həyata keçirib. Rik Rasmussen isə 40 illik təcrübəsi ilə ABŞ-ın nüfuzlu universitetlərində innovasiya, sahibkarlıq və vençur kapitalının idarəedilməsi mövzularını tədris edib, 1000-dən çox yeni yaranan şirkətə mentorluq edib.
Bölmənin digər xəbərləri
