Azərbaycanın qida mütəxəssisləri Türkiyədə təlim səfərində olublar
Bakı, 12 yanvar, AZƏRTAC
Azərbaycan Qida Təhlükəsizliyi Agentliyinin (AQTA) və Azərbaycan Qida Təhlükəsizliyi İnstitutunun (AQTİ) əməkdaşları Türkiyənin paytaxtı Ankarada təlim səfərində olublar.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, səfər Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) Mərkəzi Asiya ofisi tərəfindən həyata keçirilən "Mərkəzi Asiya ölkələrində və Türkiyədə pestisidlərin dövriyyəsinin idarə olunması və Davamlı Üzvi Çirkləndiricilərə aid edilən pestisidlərin zərərsizləşdirilməsi" layihəsi çərçivəsində həyata keçirilib və Türkiyənin bitki mühafizəsi vasitələri və aqrokimyəvi maddələrin dövriyyəsinə dair qanunvericiliyi ilə tanış olmaq məqsədi daşıyıb.
Təlim səfəri çərçivəsində AQTA və AQTİ-nin əməkdaşları Türkiyə Kənd Təsərrüfatı və Meşə Nazirliyinin Qida və nəzarət baş idarəsi ilə Bitki mənşəli istehsal baş idarəsinin iş fəaliyyəti ilə tanış olublar. Həmçinin Ankara Mərkəzi Elmi Tədqiqat Bitki Mühafizə İnstitutunda və Milli Referans Qida Laboratoriyasında olublar.
Səfər zamanı keçirilən görüşlərdə Türkiyənin aidiyyəti qurumlarının nümayəndələri ölkənin bitki mühafizəsi vasitələri və aqrokimyəvi maddələrin dövriyyəsinə dair qanunvericiliyinin Avropa İttifaqının müvafiq qanunvericiliyinə uyğunlaşdırıldığını bildirib və bu sahədə ölkələrimiz arasında təcrübə mübadiləsinin aparılmasının əhəmiyyətini qeyd ediblər. Eyni zamanda onlar təcrübələrini bölüşməyə və bu işə dəstək verməyə hazır olduqlarını vurğulayıblar.
Görüşlər zamanı hazırda Türkiyədə uğurla həyata keçirilən və bir çox Avropa ölkəsində mövcud olmayan, pestisidlərin və aqrokimyəvi maddələrin izlənilmə sisteminin ölkəmizdə tətbiq edilməsi ilə əlaqədar müzakirələr aparılıb. Müzakirələr zamanı "Mərkəzi Asiya ölkələrində və Türkiyədə pestisidlərin dövriyyəsinin idarə olunması və Davamlı Üzvi Çirkləndiricilərə aid edilən pestisidlərin zərərsizləşdirilməsi" layihəsi çərçivəsində FAO-nun dəstəyi və Türkiyə Kənd Təsərrüfatı və Meşə Nazirliyinin mütəxəssislərinin iştirakı ilə bu sahədə Azərbaycanda pilot layihənin həyata keçirilməsinin mümkün olduğu qeyd edilib.
Bölmənin digər xəbərləri
