Azərbaycanın Ukraynadakı səfirliyi Ali Radanın sədrinə müraciət ünvanlayıb
Kiyev, 7 oktyabr, AZƏRTAC
Azərbaycanın Ukraynadakı səfirliyi Ali Radanın sədri Dmitri Razumkova müraciət edib.
AZƏRTAC xəbər verir ki, müraciətdə Ukraynanın xalq deputatı İlya Kivanın bu yaxınlarda öz “Facebook” səhifəsində yerləşdirdiyi “Türkiyə və Ermənistan arasındakı müharibə” barədə videomüraciətin yolverilməz olduğu bildirilir. İlya Kiva pravoslav xristianlara müraciətlə onları “xristian və müsəlman dünyaları arasında min illik qarşıdurmaya qoşulmağa və bu işdə Ermənistana kömək göstərməyə” çağırır.
Azərbaycan səfirliyinin müraciətində deyilir: “Hesab edirik ki, Ukraynanın xalq nümayəndələrinin buna bənzər “ifadələri” ölkələrimiz arasında strateji tərəfdaşlıq ruhuna cavab vermir və həm Azərbaycanın və Türkiyənin geniş ictimaiyyəti arasında, həm də Ukrayna və dünya ictimaiyyəti arasında yalnız böyük hiddət doğura bilər. Belə təxribat xarakterli çağırışlar həm də Ukrayna Milli Təhlükəsizlik Strategiyasına və Ukrayna Konstitusiyasının “Müharibənin, zorakılığın təbliğinin, etnoslararası, irqlərarası, dinlərarası ədavətin qızışdırılmasının qadağan olunması” barədə 37-ci maddəsinə ziddir”.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
