Azərbaycanın yeniyetmə pilotu Davin Cəfərov Portuqaliyada fəxri kürsüyə yüksəlib
Bakı, 16 sentyabr, AZƏRTAC
Azərbaycanın yeniyetmə pilotu Davin Cəfərov Portuqaliyanın Leiria şəhərində keçirilən turnirdə fəxri kürsüyə qalxıb.
AZƏRTAC xəbər verir ki, yarış kəskin döngələrə malik, uzunluğu 1006 metr olan Beynəlxalq Kartodromo de Leiria trekində keçirilib. Kartinq üzrə X30 kateqoriyasında keçirilən yarışda 18 pilot iştirak edib. Birincilik şansı yüksək olan Davin sonda rəqibindən 0,01 saniyə geri qalıb. Bu yarışda iştirakdan sonra Davinə 26-28 sentyabr tarixlərində Bombarralda təşkil olunacaq ROTAX kateqoriyasında yarışa dəvət gəlib. Davin bu yarışda “BirelArt” komandasının tərkibində çıxış edəcək.
Pilot sentyabrın 29-da İtaliyanın Lonato şəhərinə yollanaraq kartinqdə BMB kateqoriyası üzrə keçiriləcək “World Grand Final” yarışında iştirak edəcək. Dünya çempionatı 1-5 oktyabrda baş tutacaq. Bu yarışa Avropa, Şimali və Cənubi Amerika, Afrika və Asiyadan pilotlar qatılacaqlar.
Bölmənin digər xəbərləri
