Çançun, 19 iyul, AZƏRTAC

Nüfuzlu “China Daily” qəzeti Çinin Kiberməkan Administrasiyasının dəstəyi ilə həyata keçirdiyi “Çin ilə görüş” layihəsi çərçivəsində əcnəbi jurnalistlərin, habelə bloger və vlogerləri üçün ölkənin şimal-şərqindəki Cilin vilayətinə mediatur təşkil edib.

AZƏRTAC xəbər verir ki, mediaturun açılış mərasimi vilayətin paytaxtı Çançun şəhərindəki dəmir yolu qovşağında keçirilib.

Tədbirdə çıxış edənlər mediaturun dünya ictimaiyyətini Çinin bölgələrində həyata keçirilən sosial-iqtisadi inkişaf layihələri, iqtisadi islahatlar, etnik və mədəni müxtəliflik, ekosistem, əhalinin həyat tərzi barədə məlumatlandırmağı hədəflədiyini bildiriblər. Qeyd olunub ki, bir neçə ildir davam edən layihədə indiyədək 50-dən çox ölkədən 200 jurnalist, habelə bloger və vloger iştirak edib.

Layihədə fəal iştirak edərək xalqlar arasında dostluq əlaqələrinin inkişafına töhfə verdiklərinə görə bir qrup jurnalistə sertifikat təqdim olunub. Təltif edilənlər arasında AZƏRTAC-ın və Azərbaycan Televiziyasının Çindəki xüsusi müxbirləri də var.

Mediatur iştirakçıları daha sonra Çançun şəhərindəki dəmir yolu qovşağının fəaliyyəti ilə tanış olublar. Çançun təkcə Çinin şimal-şərq bölgəsində istehsal olunan yüklərin deyil, həm də Cənubi Koreya və Yaponiyadan olan yüklərin dəmir yolu ilə Avropa istiqamətində daşınmasında böyük rol oynayır.

Qeyd edək ki, Çançun şəhəri Çinin avtomobil sənayesinin başlanğıcıdır. Çinin ilk avtomobil zavodunun (FAW) təməli 1953-cü ildə məhz Çançun şəhərində qoyulub. Üç il sonra isə bu zavodda Çin istehsalı ilk avtomobil buraxılıb.

Jurnalistlər Çinin ilk avtomobil zavodunun sərgi mərkəzi, habelə Çinin ilk minik avtomobili brendi olan “Hongqi” (“Qırmızı bayraq”) modelindən müxtəlif illərdə istehsal edilmiş avtomobillərin sərgiləndiyi muzeylə tanış olublar.

Mediatur çərçivəsində əcnəbi jurnalistlər tibdə geniş istifadə olunan jenşen bitkisinin bitdiyi Çanbay dağlarında onun yığılması prosesi ilə tanış olacaq, bu ölkədə qarğıdalı becərilməsində böyük payı olan Cilinin qarğıdalı plantasiyalarına, Çanbay dağlarındakı ekoloji parklara baş çəkəcəklər.

Şahin Cəfərov

AZƏRTAC-ın xüsusi müxbiri

Çançun