BAKI MUSİQİ AKADEMİYASININ TƏLƏBƏLƏRİ İLƏ GÖRÜŞ
Akademiyanın rektoru, professor Fərhad Bədəlbəyli hörmətli qonağı səmimiyyətlə salamladı, ali məktəbin tarixi və fəaliyyəti ilə tanış etdi.
Gürcüstanın birinci xanımını müşayiət edən nümayəndə heyətinin üzvü, Tbilisidəki Qafqaz kamera orkestrinin dirijoru və rəhbəri, professor Uve Berkemer Musiqi Akademiyasının tələbələri üçün ustad dərsi keçdi. Bülbül adına müsabiqənin laureatları Elçin Əzizov, Fəridə Məmmədova və başqaları maestro ilə birlikdə Motsartın operalarından ariyaları məşq etdilər.
F.Bədəlbəyli xatırlatdı ki, bu yaxınlarda professor Uve Berkemer Vyanada verilmiş konsertdə Azərbaycan klassiklərinin – Üzeyir Hacıbəyovun, Fikrət Əmirov və Qara Qarayevin əsərlərini səsləndirmişdir.
Sonra Akademiyanın tələbə qızlar dueti Fərhad Bədəlbəylinin musiqisinə “Ave Mariya”nı ifa etdilər.
Rektor hörmətli qonağa müraciətlə dedi: “Bu, mənim sizə rəmzi hədiyyəmdir. Xristian və müsəlman qızlar Tanrıya italyan və Azərbaycan dilində dua edirlər”.
Sandra Elizabet Rulofs gənc müğənnilərin istedadına heyran qaldığını söylədi. O dedi: “Düşünürəm ki, çox tezliklə biz onları dünyanın ən yaxşı səhnələrində görəcəyik”.
Hörmətli qonaq tələbələri Gürcüstana, özünün yaratdığı Klassik musiqi radiosunda çıxışa dəvət etdi.
Bölmənin digər xəbərləri
