İDMAN
Bakı Şəhər Halqası Əməliyyat Şirkətinin akademiyasının açılışı olub
Bakı, 2 fevral, AZƏRTAC
Fevralın 2-də Bakı Şəhər Halqası Əməliyyat Şirkətinin (BŞH) mərkəzi ofisində könüllülük fəaliyyətinə dair yeni qurulan akademiyanın açılış mərasimi olub.
AZƏRTAC xəbər verir ki, mərasimdə çıxış edən BŞH-nin insan resursları şöbəsinin və yeni təsis olunmuş akademiyanın rəhbəri İranə Əhmədova Bakı Şəhər Halqası akademiyasının açılmasında əsas məqsədin ölkəmizdə keçiriləcək Formula-1 yarışlarının təşkilatçılığında iştirak edəcək könüllülərin hazırlığının daha peşəkar səviyyədə reallaşdırmaq olduğunu bildirib. O, könüllülərin şəxsi inkişafının daim diqqət mərkəzində olduğunu qeyd edərək vurğulayıb ki, akademiyada hədəflərin müəyyən edilməsi, kommunikasiya bacarıqlarının artırılması, liderlik, layihələrin idarə edilməsi və başqa zəruri mövzularda təlimlər keçiriləcək. Eyni zamanda, akademiya çərçivəsində xarici dillər üzrə danışıq klubları və müasir kitabxana fəaliyyət göstərəcək. Hər bir könüllü onlar üçün yaradılan bu şəraitdən tam və təmənnasız faydalanmaq imkanına sahib olacaq.
Mərasimdə çıxış edən gənclər və idman naziri Azad Rəhimov bildirib ki, könüllülərin hazırlığı prosesinə cəlb olunan kadrların hamısı yerli mütəxəssislərdir. Gənclər arasında könüllülüyə marağın durmadan artması bizdə sevinc və fərəh hissi oyadır. İstər IV İslam Həmrəyliyi Oyunları, istərsə də Formula-1 Azərbaycan Qran-prisi üçün könüllülərin hazırlığı prosesinə cəlb olunan mütəxəssislərin hamısı yerli kadrlardır ki, onların böyük hissəsi əvvəlki yarışlarda könüllü olaraq fəaliyyət göstəriblər. Bizim üçün vacib əhəmiyyət kəsb edən əsas məqam odur ki, irimiqyaslı idman tədbirlərinə cəlb olunan gənclər yüksək təşkilatçılıq bacarıqları qazanmaqla yanaşı, onların gələcək şəxsi inkişafı da yüksək səviyyədə təmin olunsun.
Təhsil naziri Mikayıl Cabbarov bildirib ki, qarşıya qoyulan əsas məqsəd ölkənin gələcəyi üçün yüksək keyfiyyətlərə malik gənc nəsil hazırlamaqdır. Bu gün savadlı, innovativ, milli dəyərləri qorumaqla qlobal dünyaya hazır olan nəslin yetişdirilməsi ən başlıca vəzifəmizdir.
Sonra çıxış edən Formula-1 Azərbaycan Qran-prisinin rəsmi elçisi Tünzalə Ağayeva könüllülərin ölkəmizi yüksək səviyyədə təmsil etdiyini söyləyib: “Bir neçə ildir ki, ölkəmizdə keçirilən irimiqyaslı idman yarışlarında könüllülərimizlə bir arada oluram. Hər dəfə şahid olmuram ki, könüllülərimiz ölkəmizi ən yüksək səviyyədə təmsil etmək üçün əllərindən gələni edirlər. Onlar bu fəaliyyətə böyük sevgi, həvəs və xüsusən də möhtəşəm coşqu ilə yanaşırlar. Ümidvaram ki, biz belə yüksək əhvali-ruhiyyə ilə qısa müddətdə daha böyük uğurlara nail olacağıq”.
Qeyd edək ki, bu ilin iyunun 23-25-də təşkil ediləcək Formula-1 Azərbaycan Qran-prisində üç min könüllünün iştirakı nəzərdə tutulub. Könüllülər proqramına müraciətlərin qəbulu hazırda davam edir və bu proses fevralın sonunda başa çatacaq.