Bakı Turizm Peşə Məktəbində Bilik günü qeyd olunmuşdur
Bakı, 16 sentyabr (AZƏRTAC). Sentyabrın 16-da Azərbaycan Turizm İnstitutunun nəzdindəki Bakı Turizm Peşə Məktəbində Bilik günü qeyd olunmuşdur.
Əvvəlcə Azərbaycanın dövlət himni səsləndirilmişdir.
AZƏRTAC xəbər verir ki, tədbirdə mədəniyyət və turizm naziri Əbülfəs Qarayev ölkəmizdə təhsilin, turizmin inkişafı istiqamətində dövlət tərəfindən həyata keçirilən islahatlardan danışmışdır. Bildirmişdir ki, ölkənin dinamik inkişafına, insanların həyat səviyyəsinə, dünyagörüşünə turizmin təsiri böyükdür. Cari ildə bir milyard insan bir ölkədən digərinə getmişdir. Azərbaycana gələn turistlərin sayı hər il 10 faiz artır. Ölkəmizə gələn xarici qonaqlara, eləcə də ölkə daxilində səyahət edən vətəndaşlara yüksək səviyyədə xidmət göstərmək üçün peşəkar mütəxəssis olmaq lazımdır.
Nazir tələbələrə turizm sənayesinin layiqli təmsilçiləri olmaları üçün ilk növbədə Vətəni və insanları sevməyin, yaxşı çalışmağın, müasir bilikləri mənimsəməyin və təcrübə qazanmağın vacibliyini qeyd etmişdir.
Azərbaycan Turizm İnstitutunun (ATİ) rektoru, professor Cəfər Cəfərov, turizm peşə məktəbinin direktoru Faiq Babayev tələbələri yeni tədris ilinin başlanması münasibətilə təbrik etmiş, onlara uğurlar arzulamışlar.
Bildirilmişdir ki, turizm peşə məktəbində 12 ixtisas, o cümlədən ATİ-nin xidmət mühəndisliyi fakültəsinin sosial iş, beynəlxalq münasibətlər, muzeyşünaslıq, diyarşünaslıq abidələrinin qorunması, regionşünaslıq, qida məhsullarının mühəndisliyi, nəqliyyat servisi ixtisasları üzrə hazırlıq aparılır. Həmçinin institutun doqquz kafedrasından üçü də bu binada fəaliyyət göstərir.
Çıxışlarda Bakı Turizm Peşə Məktəbini bitirəcək gənclərin gələcəkdə bacarıqlı, peşəkar mütəxəssislər kimi turizm sənayesində çalışacaqlarına əminlik ifadə edilmişdir.
Sonra mədəniyyət və turizm naziri Əbülfəs Qarayev yüksək bal toplamış gənclərə tələbə biletlərini təqdim etmiş, onlara uğurlar arzulamışdır.
Bölmənin digər xəbərləri
