Bakı Zooloji Parkında ilk gecə turu keçirilib
Bakı, 31 oktyabr, AZƏRTAC
Bakı Zooloji Parkında ilk dəfə gecə turu təşkil olunub. 2 saat davam edən tura 200-dən çox iştirakçı qoşulub. Ziyarətçilər tur zamanı Zooloji Park sakinlərini gecə saatlarında müşahidə ediblər.
Zooloji parkdan AZƏRTAC-a bildirilib ki, turun məqsədi heyvanların gecə həyat tərzi ilə tanışlıqdır. Tədbirə qatılanlar günəş batandan sonra heyvanlar aləmində nələrin baş verdiyini izləyib, gecə aktiv olan fauna növlərini daha yaxından seyretmə şansı əldə ediblər. Tur zamanı qonaqlar Bakı Zooloji Parkının könüllüləri tərəfindən istiqamətləndirilib, ərazini istəklərinə uyğun olaraq həm piyada gəzib, həm də elektrikli avtomobil ilə səyahət edə biliblər. O cümlədən, tura qatılanlara bələdçi tərəfindən heyvanlar haqqında məlumatlar da verilib. İştirakçılar elektrikli avtomobil ilə səyahət edərkən manqust, şir, bəbir, porsuq, yenot, su samuru, zebra, ayı, canavar, yaquarı daha yaxından seyr edib, piyada gəzinti zamanı isə pavian qamadril, yırtıcı quşlar, xallı maral, pələng, tur, muflon kimi bir sıra heyvanlar ilə tanış olublar. İnsanlar yalnız gecə vaxtı heyvanların hökmdarlığını, cəlbedici və vahiməli baxışlarını görə bilərlər. Məhz gecə turunda ziyarətçilər bu görünüşləri özündə əks etdirən foto şəkil və videoları əldə edə biliblər.
Qeyd edək ki, belə turların mütəmadi olaraq keçirilməsi nəzərdə tutulur.
2021-ci ildə yenidənqurma işlərindən sonra qapılarını ziyarətçilərə açan Bakı Zooloji Parkında çoxsaylı tədbirlər keçirilməyə başlanılıb. Tədbirlərin əsas məqsədi maraqlı və əyləncəli zaman keçirməklə ziyarətçiləri təbiət haqqında maarifləndirmə, onlarda canlı aləmə, xüsusən də Azərbaycanın nadir və nəsli kəsilmək üzrə olan heyvan növlərinə sevgi və qayğı hissini formalaşdırmaqdır.
Bölmənin digər xəbərləri
