MƏDƏNİYYƏT
Bakıda “AITF-2011” 10-cu yubiley Azərbaycan Beynəlxalq turizm və səyahətlər sərgisi keçiriləcəkdir
Bakı, 25 aprel (AZƏRTAC). Aprelin 28-dən 30-dək Bakı Sərgi Mərkəzində “AITF-2011” 10-cu yubiley Azərbaycan Beynəlxalq turizm və səyahətlər sərgisi keçiriləcəkdir.
Sərginin təşkilatçısı “İteca Kaspian” şirkətindən AZƏRTAC-a bildirmişlər ki, indiyədək bu nüfuzlu beynəlxalq tədbirin keçirildiyi 9 ildə “AITF” haqlı olaraq bütün Xəzəryanı regionun turizm sənayesinin “əsas hadisəsi” statusunu qazanmışdır. Çünki bu sərgi çərçivəsində əhəmiyyətli görüşlər keçirilir, tərəfdaşlıq haqqında müqavilələr imzalanır və yeni proqramlar, qiymətlər və istiqamətlər barədə məlumat verilir.
Ötən il “AITF-2010” sərgisini Azərbaycan Respublikasının Prezidenti İlham Əliyevin şəxsən ziyarət etməsi bu beynəlxalq tədbirin tarixində ən mühüm hadisə kimi yadda qalmışdır. Azərbaycanın dövlət başçısının burada olması sərginin statusunu əhəmiyyətli dərəcədə yüksəldərək bütün tədbir iştirakçıları üçün parlaq bir hadisəyə çevrilmişdir.
Bu il “AITF” sərgisi birdən-birə iki əlamətdar hadisəni – özünün 10 illik yubileyini və 2011-ci ilin Azərbaycanda “Turizm İli” elan olunmasını bayram edəcəkdir. Ölkənin turizm sektoru üçün əlamətdar olan bu hadisə, şübhəsiz, tarixə parlaq dəyişikliklər mərhələsi kimi daxil olacaqdır. Sərginin cari il üçün proqnozlaşdırılan artım dinamikası da belə bir nikbin qənaətə gəlməyə əsas verir. “AITF-2011” yubiley sərgisində dünyanın müxtəlif ölkələrindən 200-dən çox şirkətin iştirakı, habelə 24 ölkənin və 61 istiqamətin təqdim ediləcəyi gözlənilir.
“AITF” sərgisinin nailiyyətlərindən biri də odur ki, 2010-cu ilin tədbirində iştirak etmiş bütün milli qruplar “AITF-2011”-də iştiraklarını bir il əvvəlcədən sifariş etmişlər. Builki sərgidə Yunanıstan, Gürcüstan, Hindistan, Türkiyə və Çexiyanın milli stendlərinin iştirak edəcəkləri artıq məlumdur.
Sərgi bünövrəsi qoyulduğu gündən etibarən ənənəvi olaraq Mədəniyyət və Turizm Nazirliyinin rəsmi dəstəyi ilə keçirilir. Bundan əlavə, sərgiyə Dünya Turizm Təşkilatı, Azərbaycan Respublikası Sahibkarlar (İşəgötürənlər) Təşkilatlarının Milli Konfederasiyası tərəfindən də dəstək verilir. Eyni zamanda, Türkiyə ardıcıl olaraq ikinci ildir ki, “AITF” sərgisinin tərəfdaş ölkəsi qismində çıxış edir.
Ötən il olduğu kimi bu dəfə də Mədəniyyət və Turizm Nazirliyi tərəfindən Azərbaycanda təşkil edilən 2-ci Ümumrespublika daxili turizm sərgisi “AITF” ilə birgə keçiriləcəkdir. Bu sərginin ekspozisiyası 18 regiondan təxminən 100 şirkəti təqdim edəcəkdir. Sərgi ölkəmizin regional istirahət zonaları, sanatoriyaları və mehmanxanalarının parlaq koloritini nümayiş etdirəcək və “AITF-2011”-in qonaqlarını və iştirakçılarını bir sərgi meydançası daxilində Azərbaycan xalqının rəngarəng və zəngin folkloru, mətbəxi və ənənələri ilə tanış edəcəkdir.