BƏƏ-dəki “Azərbaycan” Cəmiyyəti Dubay Əmirliyinin hökumət nümayəndələri ilə görüşlər keçirmişdir
Bakı, 14 sentyabr (AZƏRTAC). Birləşmiş Ərəb Əmirliklərində (BƏƏ) fəaliyyət göstərən “Azərbaycan” Cəmiyyətinin sədri Samir İmanov rəsmi Bakının Ermənistan-Azərbaycan, Dağlıq Qarabağ münaqişəsinin nizamlanması istiqamətində gördüyü işlərə dəstək məqsədi ilə BƏƏ-nin müxtəlif səviyyəli məmurları ilə görüşlər keçirmişdir.
Diasporla İş üzrə Dövlət Komitəsindən AZƏRTAC-a bildirmişlər ki, görüşlərdə BƏƏ-dən olan məmurlar Qarabağ həqiqətləri barədə məlumatlandırılmışlar. Dubay Əmirliyinin Mərkəzi Kitabxanasının müdiri İsa Əhməd Əl-Mulla, Dubay Aparatının ictimaiyyətlə iş üzrə idarəsinin müdiri Əhməd Əl-Zahid, aparatın digər məsul əməkdaşı Əhməd Əl-Asam Məhəmməd və Əmirliyin müxtəlif nazirlik və komitələrinin nümayəndələri ilə görüşlərdə Samir İmanov son günlər erməni tərəfinin cəbhə bölgəsində atəşkəs rejimini intensiv surətdə pozduğunu bildirmişdir. Azərbaycanın sülhpərvər siyasət yeritdiyini deyən Samir İmanov rəsmi Bakının Dağlıq Qarabağ probleminin danışıqlar yolu ilə həlli üçün beynəlxalq hüququn norma və prinsipləri çərçivəsində gördüyü işlərdən söz açmışdır. “Azərbaycan” Cəmiyyətinin sədri Dağlıq Qarabağ münaqişəsinin həll olunmaması ilə bağlı subyektiv səbəblərə də toxunmuş, beynəlxalq təşkilatların, xüsusilə də ATƏT-in Minsk qrupunun bu məsələdə qəti mövqe nümayiş etdirməməsinin problemin çözülməsinin 20 ilə yaxındır ki, uzanmasına gətirib çıxardığını qeyd etmişdir.
İsa Əhməd Əl-Mulla və Dubay Əmirliyinin hökumət nümayəndələri ətraflı məlumata görə S.İmanova təşəkkür etmiş, müntəzəm keçirilməli olan belə görüşlərin ölkələrimiz arasında əlaqələrin inkişafına töhfə verdiyini söyləmişlər. Onlar ümid etdiklərini bildirmişlər ki, Ermənistan tezliklə BMT Təhlükəsizlik Şurasının qəbul etdiyi dörd qətnaməyə əsasən işğal olunmuş Azərbaycan torpaqlarını geri qaytaracaq və ədalət bərqərar olunacaqdır.
S.İmanov Diasporla İş üzrə Dövlət Komitəsi tərəfindən “Azərbaycan” Cəmiyyətinə təqdim olunmuş ərəb dilində “Qarabağ” kitabını, Heydər Əliyev Fondunun hazırladığı “Qarabağ haqqında həqiqi faktlar” toplusunu, Qarabağ həqiqətlərindən bəhs edən “Tarixin səsi” kitabçasını, “Erməni terroru” kitabını, “Kitabi-Dədə Qorqud” ensiklopediyasını, Azərbaycan Prezidenti İlham Əliyevin həyat və fəaliyyətindən bəhs edən “İlham. Prezidentin Portreti” kitabını, ümummilli lider Heydər Əliyevin həyat və fəaliyyətindən bəhs edən ərəb və ingilis dillərində müxtəlif nəşrləri Dubay Əmirliyinin Mərkəzi Kitabxanasına və hökumət rəsmilərinə hədiyyə etmişdir.
Ötən həftə “Azərbaycan” Cəmiyyətinin sədri S.İmanovun təşkilatçılığı ilə Dubayda siyasi ekspertlərin, ictimai xadimlərin və KİV nümayəndələrinin iştirakı ilə Ermənistan-Azərbaycan, Dağlıq Qarabağ münaqişəsi ilə bağlı konfrans keçirilmişdir. Konfransda münaqişənin həlli ilə bağlı fikir mübadiləsi aparılmış, rəsmi Yerevanın qeyri-konstruktiv mövqeyinin bütün region üçün təhlükə yaratdığı qeyd olunmuşdur. Dubay Əmirliyində böyük marağa səbəb olmuş bu konfransda səslənən fikirlər əsasında Əmirliyin rəsmi orqanı olan nüfuzlu “Al-Bayan” qəzetində geniş məqalə dərc edilmişdir.
Bölmənin digər xəbərləri
