Beynəlxalq turizm gözlənilən nəticələri yüksək sürətlə doğrultmaqdadır
Bakı, 21 avqust (AZƏRTAC). Dünya Turizm Təşkilatı (DTT) 2013-cü ilin dörd ayının nəticələrini açıqlamışdır.
AZƏRTAC təşkilatın rəsmi saytına istinadla xəbər verir ki, bu ilin yanvar-aprel aylarında dünyada 298 milyon turist səyahəti reallaşmışdır ki, bu da ötən ilin müvafiq dövrü ilə müqayisədə 12 milyon nəfər (4,3 faiz) artıqdır.
DTT-nin 2013-cü ilin yay turizm mövsümü üçün proqnozlarına görə, may-avqust aylarında dünya üzrə 435 milyon nəfərin turist səfərinə çıxması gözlənilir.
Bir çox regionlar üzrə müsbət nəticələr müşahidə olunsa da, turist səfərlərinin sayında azalmanın qeydə alındığı regionlar da vardır. Asiya-Sakit okean hövzəsində 6, Avropada 5, Yaxın Şərqdə 5 faiz artım, Amerika regionu üzrə 1, Afrikada isə 2 faiz azalma qeydə alınmışdır.
DTT-nin ekspertləri hesablamışlar ki, Cənub-Şərqi Asiyada 12, Cənubi Asiyada 9, həmçinin Mərkəzi və Şərqi Avropada 9 faiz artım qeyd alınmışdır.
DTT-nin baş katibi Taleb Rifai bildirmişdir ki, beynəlxalq turizm gözlənilən nəticələri yüksək sürətlə doğrultmaqdadır. İlk ayların göstəriciləri onu deməyə əsas verir ki, hazırda turizm dünyanın bir çox ölkələrində iqtisadiyyatın aparıcı istiqaməti kimi inkişaf edir.
Bölmənin digər xəbərləri
