Bişkekdə “Heydər Əliyev-zamanın önündə” mövzusunda beynəlxalq konfrans keçirilmişdir
Bişkek, 26 aprel (AZƏRTAC). Azərbaycanın Qırğızıstandakı səfirliyi Bişkekdəki Qırğız-Türk “Manas” Universiteti ilə birgə bu təhsil ocağında “Heydər Əliyev-zamanın önündə” mövzusunda beynəlxalq konfrans keçirmişdir.
Tədbirdə Qırğızıstan parlamentinin deputatları, bu ölkədə akkreditə olunmuş KİV nümayəndələri, səfirlər, elm, mədəniyyət və incəsənət xadimləri, universitetin professor-müəllim heyəti, tələbələr, diasporumuzun üzvləri iştirak etmişlər.
Mərasim iştirakçıları əvvəlcə ulu öndər Heydər Əliyevin həyat və fəaliyyəti ilə əlaqədar kitab sərgisinə baxmışlar. Viktor Andrianovun və Hüseynbala Mirələmovun “Heydər Əliyev”, Elmira Axundovanın “Şəxsiyyət və zaman” çoxcildliyi, Hidayət Orucovun rus dilində “Heydər Əliyev və Azərbaycanın milli siyasəti” kitabları, “Heydər Əliyev-Müstəqilliyimiz əbədidir” çoxcildliliyi, Bişkekdəki Türkdilli Dövlətlərin Siyasətinə Dəstək Fondunun rus dilində çap etdirdiyi “Prezident İlham Əliyev” üçcildliyi və digər nəşrlər qonaqların marağına səbəb olmuşdur.
Konfransda Azərbaycanın Qırğızıstandakı səfiri Hidayət Orucov ümummilli lider Heydər Əliyevin həyat və fəaliyyəti haqqında geniş məruzə etmişdir. Bildirilmişdir ki, ulu öndər Heydər Əliyev həm keçmiş SSRİ rəhbərliyində yüksək vəzifə tutarkən, həm də xalqımızın təkidli tələbi ilə müstəqil Azərbaycanın Prezidenti seçildikdən sonra milli mənəvi dəyərlərimizin bərpa olunması və qorunub saxlanılması istiqamətində əvəzolunmaz xidmətlər göstərmişdir. Qeyd edilmişdir ki, məhz ulu öndərin səyləri nəticəsində Azərbaycan ən inkişaf etmiş ölkələr sırasına çıxmışdır.
H.Orucov demişdir ki, məhz ümummilli lider Heydər Əliyev müstəqil Azərbaycanın rəhbəri olduqdan sonra bütün sahələrdə köklü islahatlara başlanmış, onun siyasi iradəsi nəticəsində Ermənistanın Azərbaycana təcavüzü dayandırılmış, atəşkəsə nail olunmuşdur. Məlumdur ki, Ermənistan Azərbaycan torpaqlarının 20 faizini işğal etmiş, bir milyondan artıq soydaşımız qaçqın və məcburi köçkünə çevrilmişdir. BMT Təhlükəsizlik Şurası Azərbaycan torpaqlarının təcavüzdən azad edilməsi ilə bağlı dörd qətnamə qəbul etmişdir. Sənədlərdə deyilir ki, təcavüzkar Ermənistan işğal etdiyi Azərbaycan torpaqlarını qeyd-şərtsiz azad etməli, qaçqın və köçkünlər doğma yurd-yuvalarına qayıtmalıdırlar. Təəssüf ki, indiyədək Ermənistan BMT-nin bu tələblərini yerinə yetirməmişdir.
Səfir bildirmişdir ki, Heydər Əliyev türkdilli dövlətlərə və muxtariyyət statusu olan türkdilli xalqlara xüsusi qayğı ilə yanaşırdı. Ulu öndər demişdir: “Manas”ın dili bizim ümumi dilimizdir”.
H.Orucov qeyd etmişdir ki, Heydər Əliyev 1995-ci il avqustun 28-də Qırğızıstanda “Manas” eposunun 1000 illiyi ilə bağlı yubiley təntənələrində iştirak etmiş, öz çıxışında belə demişdi: “Manas” qırğız xalqının müdriklik, ağıl, mərdlik və cəsarət simvoludur”.
Qırğızıstan Prezidenti Aparatı rəhbərinin müavini, beynəlxalq əlaqələr şöbəsinin müdiri Sapar İsakov Qırğızıstan ilə Azərbaycan arasında əlaqələrin qurulması və möhkəmlənməsində ulu öndər Heydər Əliyevin xüsusi xidmətləri olduğunu bildirmişdir. O, Heydər Əliyevin dünya şöhrətli siyasi xadim, türk dünyasının tanınmış siyasətçilərindən olduğunu diqqətə çatdırmışdır. Bişkekdə ulu öndər Heydər Əliyev adına parkın salınması ilə əlaqədar qərarın qəbul edilməsi diqqətə çatdırılmışdır.
Universitetin rektoru, professor Səbahəddin Balçı bildirmişdir ki, Heydər Əliyev Türkiyə türklərini, o cümlədən digər türkdilli xalqları çox sevirdi. Ümummilli lider demişdir ki, “Biz bir millət, iki dövlətik”.
Qırğızıstanın insan hüquqları üzrə müvəkkili Tursunbek Akun, Arabaeva adına Qırğızıstan Dövlət Universitetinin rektoru Tolobek Abdıraxmanov, ictimai xadim Aydar Kerimkulov ümummilli lider Heydər Əliyevi dünya şöhrətli siyasi xadim kimi təhlil etmişlər.
Konfransın bölmələr üzrə keçirilən iclaslarında filologiya elmləri doktoru, professor Kadırali Konkobaev “Heydər Əliyev türkdilli xalqların problemi və dili haqqında”, Qırğızıstan-Rusiya Slavyan Universiteti İranistika Mərkəzinin direktoru Məlahət Məmmədova “Heydər Əliyev və hüquqi dövlətin əsası”, “Kırqız Tuusu” qəzetinin baş redaktoru Bakıtbek Orunbekov “Heydər Əliyev-yeni müstəqil Azərbaycanın xilaskarı”, fəlsəfə elmləri namizədi Olçobay Karataev “Azərbaycanın müstəqilliyi və Heydər Əliyev” dosent Umut Asanova “Heydər Əliyev və liderliyin fəlsəfi tərəfləri”, Qırğızıstan Gimnastika Federasiyasının prezidenti, soydaşımız Əsəd Əsədov “Heydər Əliyev soydaşlarımızın gözü ilə” və universitetin müəllimi Aydın İdil “Heydər Əliyev və türk dünyası” mövzularında geniş məruzələr etmişlər.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
