BRİTANİYANIN HAVA LİMANLARI VAHİMƏ İÇİNDƏDİR
“British Airways” şirkəti bəzi uçuşları təxirə salmış və sərnişinlərinə reyslərin uzun müddət ləngidiləcəyi barədə xəbərdarlıq etmişdir.
Böyük Britaniya hava limanlarının operatoru “British Airports Authority” (BAA) şirkəti elan etmişdir ki, reyslərin əksəriyyəti təhlükəsizlik tədbirləri gücləndirildiyinə görə saxlanılacaqdır.
BAA digər növ nəqliyyat vasitələrindən istifadə edə bilən şəxslərə hava limanlarına gəlməməyi tövsiyə edir. Bir çox sərnişinlərə evə getmək məsləhət görülmüşdür, çünki onların təyyarələri yaxın vaxtlarda uçmayacaqdır.
Bundan əvvəl Britaniya Nəqliyyat Nazirliyinin bütün aviadaşıyıcılara və hava limanlarına göndərdiyi təlimatda sərnişinlərə əl yükünü təyyarəyə gətirmək qadağan edilir. Hava limanlarına gələnlərin hamısını həm əl ilə yoxlayır, həm də metalaxtaran çərçivədən keçirirlər. Sərnişinlərin hətta ayaqqabıları da yoxlanılır.
Xatırladaq ki, Böyük Britaniya polisi elan etmişdir ki, terrorçular ölkənin hava limanlarından ABŞ şəhərlərinə uçmalı olan 12 təyyarəni partlatmağı planlaşdırmışlar.
İlkin məlumata görə, Londonda terror aktlarında şübhəli bilinən 20 adam tutulmuşdur.
“Vaşinqton post” qəzeti yazır ki, terrorçuların planlarının ifşa edilməsi ilə əlaqədar ABŞ hökuməti bu ölkədən gələn aviareyslər üçün terrora qarşı təhlükəsizlik səviyyəsini ən yüksək həddə qaldırmışdır. Bundan başqa, həm daxili, həm də xarici bütün reyslərin təhlükəsizliyi səviyyəsi də bir pillə qaldırılmışdır.
Bölmənin digər xəbərləri
