Cənubi Koreyanın aparıcı müxalifət partiyasının lideri istefa verib
Bakı, 9 aprel, AZƏRTAC
Cənubi Koreyada keçiriləcək prezident seçkilərində iştirak etmək üçün bu ölkənin aparıcı müxalif “Toburo” partiyasının sədri Li Çje Mön postundan istefa verib.
AZƏRTAC Yonhap agentliyinə istinadla xəbər verir ki, mümkün namizədlər arasında favorit hesab olunan Li Çje Mön qarşıdan gələn seçkilərdə iştirakını aprelin 10-da elan edə bilər. O, 2022-ci il seçkilərində Yun Sok Yola bir faizdən az səslə uduzmuşdu.
Xatırladaq ki, aprelin 4-də Koreya Respublikasının Konstitusiya Məhkəməsi prezident Yun Sok Yolu hakimiyyətdən kənarlaşdırıb. Növbədənkənar seçkilər iyunun 3-nə təyin edilib.
Li Çje Mön dünən vəzifəsindən istefa verən sabiq əmək naziri Kim Mun Su ilə rəqabət aparacaq. Hazırda mühafizəkar “Vətəndaş gücü” partiyasını təmsil edən Kim Mun Su əvvəllər fəhlə hərəkatının fəalı olub. Sabiq əmək naziri prezident olacağı təqdirdə atom elektrik stansiyaları üçün yanacağı müstəqil şəkildə zənginləşdirmək hüququ əldə edəcəyinə və Şimali Koreyanın hərəkətlərinə cavab olaraq ölkəsinin sualtı nüvə qayıqlarına sahib olacağına vəd verib. Cənubi Koreya belə bir hüquq qazanarsa, tez bir zamanda nüvə dövlətinə çevrilə bilər. Seul nüvə silahı hazırlamaq üçün bütün lazımi texnologiya və təcrübəyə malik olduğu halda, siyasi səbəblərdən bunu etmir.
Bölmənin digər xəbərləri
