Cənubi Qafqazda fəal əməkdaşlıq və inteqrasiya mühitinin yaradılması qarşıda duran prioritet vəzifədir
Bakı, 23 may, AZƏRTAC
Müzəffər Ali Baş Komandan, Prezident İlham Əliyev parlaq Qələbəmizlə başa çatan Vətən müharibəsi günlərində olduğu kimi, indiki dövrdə də Azərbaycan həqiqətlərini dünya ictimaiyyətinə dəqiq, məntiqli, faktlara söykənən çıxışları ilə çatdırır. Ermənistanın və havadarlarının ölkəmiz haqqında qarayaxma kampaniyalarının və təzyiq cəhdlərinin qarşısını qətiyyətlə alır. Xalqımızın beynəlxalq hüququn norma və prinsipləri, BMT Təhlükəsizlik Şurasının məlum qətnamələri əsasında haqq savaşı apararaq, ərazi bütövlüyümüzü reallaşdırdığını bildirir.
Dövlət başçısının mayın 20-də Nizami Gəncəvi Beynəlxalq Mərkəzi tərəfindən keçirilən “Cənubi Qafqaz: Regional inkişaf və əməkdaşlıq perspektivləri” adlı tədbirdə çıxışı, həmçinin iştirakçıların suallarına dolğun cavabları da bu baxımdan mühüm önəm daşıyır.
Burada onu da vurğulamaq istərdim ki, Nizami Gəncəvi Beynəlxalq Mərkəzinin Cənubi Qafqaz regionunda kəskin dəyişikliklərlə müşayiət olunan yeni vəziyyətin və tələb olunan yeni yanaşmaların ilk dəfə beynəlxalq diskussiya açması, Mərkəzin dünya liderlərini “Çatam Hauz” qaydalarına uyğun olaraq Qarabağla bağlı müzakirələrə cəlb etməsi bölgədə yaranan reallıqlar haqqında xarici ölkələrdə aydın, hərtərəfli təsəvvür yaradılması baxımında böyük əhəmiyyətə malikdir. Bu, eyni zamanda, Nizami Gəncəvi Beynəlxalq Mərkəzinin artıq Cənubi Qafqazda dialoq və inkişaf üçün beynəlxalq səviyyəli platforma kimi tanınmasından xəbər verir.
Bunu AZƏRTAC-a açıqlamasında AMEA-nın Riyaziyyat və Mexanika İnstitutunun böyük elmi işçisi, mexanika üzrə fəlsəfə doktoru Emin Bağırov deyib.
Emin Bağırov vurğulayıb ki, Nizami Gəncəvi Beynəlxalq Mərkəzinin təşkil etdiyi müzakirələrdə bir sıra mühüm məsələlər ətrafında geniş fikir mübadiləsi aparılıb. Cənubi Qafqaz regionunun siyasi və iqtisadi aktuallığının durmadan artması, bölgədə inkişaf və əməkdaşlıq perspektivlərinin qlobal əhəmiyyət daşıması, burada fəal əməkdaşlıq və inteqrasiya mühitinin yaradılması, habelə qarşıdakı dövrdə yeni gündəlik əsasında layihələrin reallaşdırılması ilə bağlı fikir və mülahizələr gələcək səmərəli fəaliyyət proqramının hazırlanmasını şərtləndirib.
Müzakirələrdə dövlətimizin başçısı çıxış və suallara cavablarında Ermənistana mesajlarını da ünvanlayıb: “Biz istəsək də, istəməsək də qonşuyuq və yanaşı yaşamalıyıq və bir daha bu birgə yaşamanı öyrənməliyik. Bu, asan deyil. Burada emosiyalar var. Xüsusən də, Azərbaycan xalqı azad edilmiş torpaqlara səfərlər etdiyi zaman və tam yerlə-yeksan olunan yerləri görəndə ağır hisslər yaşayır. Azərbaycan əməkdaşlığa hazırdır. Otuz il ərzində əziyyət çəkmiş tərəf olmağımıza baxmayaraq, biz hazırıq və bunu dəfələrlə bəyan etmişik ki, səhifə çevrilsin və yeni fəsil başlasın, gələcək haqqında danışılsın, keçmiş haqqında danışılmasın. Ermənistan hökumətinin ən böyük səhvi və problemi ondan ibarətdir ki, onlar yalnız keçmiş haqqında danışırlar. Onlar gələcək haqqında düşünmürlər. Biz gələcək haqqında düşünürük”.
Emin Bağırov daha sonra deyib: “Tədbirdə Prezident İlham Əliyev çıxışı və suallara cavabları ilə bir sıra digər mühüm məsələlərə də aydınlıq gətirdi. Məsələn, dövlətimizin başçısı Qarabağın Rusiya ilə ABŞ arasında mövcud nadir əməkdaşlıq mövzularından biri olmasını diqqətə çatdırdı. Bildirildi ki, hər iki dövlət Minsk qrupunun həmsədrləri kimi 30 il ərzində Azərbaycanla Ermənistan arasında danışıqlar prosesində fəal iştirakçı olub. ABŞ-la Rusiya arasında əlaqələrin çox aşağı səviyyədə olduğu indiki vaxtda belə bu ölkələrin fəaliyyətində Qarabağ mövzusu aktuallığını itirməyib.
Yeri gəlmişkən, Azərbaycan-ABŞ münasibətlərinin böyük potensialı və perspektivi var. Əməkdaşlığın vacib sahəsi enerji təhlükəsizliyidir. ABŞ ölkəmizə hər zaman iri enerji layihələrinin icrasında yardımçı olub, neft-qaz kəmərləri və ya Amerika şirkətlərinin sərmayə qoyuluşu məsələlərində Azərbaycanı daim dəstəkləyib. Əməkdaşlıq sahələrində müasir texnologiyalar və ticarət məsələləri də xüsusi yer tutub.
Bütün bunlarla bərabər, Azərbaycanın ABŞ hərbi avadanlığına çıxış əldə etmək istəyi də sirr deyil. Lakin bu məsələ əlaqələrdə aparıcı rola malik olan ABŞ-dan asılıdır və şübhəsiz ki, hər şey qarşı tərəfin gündəliyi ilə bağlıdır”.
Emin Bağırov açıqlamasının sonunda Prezident İlham Əliyevin müzakirələrdə Azərbaycan-İsrail münasibətləri ilə bağlı fikirlərinin də böyük maraq doğurduğunu diqqətə çatdırıb: “Dövlətimizin başçısı bildirdi ki, hər iki ölkə arasında əməkdaşlıq yüksələn xətt üzrə inkişaf edir. Azərbaycan-İsrail fəal ticarət tərəfdaşlarıdır. Onlar arasında ticarətin həcmi getdikcə artır. Bu ölkələrin maraq dairəsində olan sahələrdən biri də turizmdir. Pandemiyadan əvvəl Azərbaycan ilə İsrail arasında müntəzəm gündəlik uçuşlar həyata keçirilirdi, qarşılıqlı səfərlər reallaşdırılırdı. Çünki İsraildə böyük yəhudi-azərbaycanlı icması var, Azərbaycanda isə regionun ən çoxsaylı fəal yəhudi icması mövcuddur. Azərbaycanın yəhudi icması Azərbaycan-İsrail ikitərəfli münasibətlərində çox önəmli rol oynayır. Azərbaycanın fəal yəhudi vətəndaşları tərəfindən isə iki ölkə arasında münasibətlərin daha da güclənməsi istiqamətində önəmli layihələr gerçəkləşdirilir. Bütün bunlarla bərabər iki ölkə arasında müdafiə sənayesi ilə əlaqədar əməkdaşlıq da xüsusi yer tutur”.
Bölmənin digər xəbərləri
