Çingiz Mustafayev: Azərbaycan qılıncoynatmasının əvvəlki şöhrətini qaytarmaq üçün əsaslı zəmin yaradılır
Bakı, 3 noyabr, AZƏRTAC
Ölkəmizdə qılıncoynatmanın tarixi ənənələri mövcuddur. Müasir idman tariximizdə Azərbaycan qılıncoynatma məktəbinin yetirmələri Olimpiya, dünya çempionatlarında parlaq qələbələri ilə böyük şöhrət qazanıblar. Hazırda Azərbaycan Qılıncoynatma Federasiyasının rəhbərliyi bu idman növünün inkişafı istiqamətində bir sıra tədbirlər həyata keçirir. Azərbaycan qılıncoynatmasının dünya şöhrətini qaytarmaq üçün əsaslı zəmin yaradılır.
Bu sözləri AZƏRTAC-a müsahibəsində qılıncoynatma üzrə yığma komandanın baş məşqçisi Çingiz Mustafayev deyib.
Qılıncoynatma üzrə yığma komandanın liderlərindən danışan baş məşqçi Sevil və Sevinc Bünyatova bacılarının artıq bu idman növü üzrə bir sıra nailiyyətlər qazandıqlarını, birinci Avropa Oyunlarında mükafata layiq yer tutduqlarını bildirib. Qeyd edib ki, yığma komandanın qarşısında duran ümdə vəzifə növbəti olimpiadaya vəsiqə qazanmaq və bu möhtəşəm yarışlarda uğurlu iştiraka nail olmaqdır: “2019-cu il ciddi sınaq illərindən biridir. Olimpiya Oyunlarına lisenziya xarakterli yarışlarda yüksək nəticələr əldə etmək üçün fasiləsiz məşqlər keçirik. Ötən dünya çempionatının nəticələri göstərdi ki, bu sahədə uğurlar əldə edə bilərik. Səbinə Kərimova (Mikina), Sevil və Sevinc Bünyatovadan ibarət sablya üzrə qadınlardan ibarət komandamız dünya çempionatının ilk mərhələsində Tailand millisinə qalib gəlsə də, səkkizliyə düşmək uğrunda görüşdə İtaliya millisinə az fərqlə məğlub oldu. Komandamız 13-14-cü yerlər uğrunda görüşlərdə Honkonq və İran millilərini məğlub edərək 13-cü sırada qərarlaşdı. Düşünürəm ki, hazırlaşmağa bir neçə ay vaxtımız olsa idi, nəticələr daha yaxşı ola bilərdi. Səbinə Kərimova bu ilin aprelində ana olub. Məşqlərə bir il fasilə verdikdən sonra dünya çempionatı onun iştirak etdiyi ilk böyük yarış idi. Hazırda təlim-məşqlərə qatılıb və bərpa prosesi keçir. Yığmanın liderlərindən biri olan Kənan Əliyev ötən il dünya və Avropa kuboku yarışlarında gücünü sınayıb. Avropada 24-cü, dünya kubokunda isə 20-ci olub”.
Ötən ilin noyabrından yığmanın sükanı arxasına keçən baş məşqçi əvvəlki aylar ərzində komandalara baxış, onların tərkibinin müəyyənləşdirilməsi, seleksiya işləri ilə bağlı xeyli iş görüldüyünü deyib: “Yığma komandaya 12 məşqçi cəlb etmişik. Bu yaxınlarda iki legioner məşqçi ilə də danışıqlar aparılıb. Onlardan biri - Ukraynanın yeniyetmələrdən ibarət yığma komandasının baş məşqçisi Alyona Miranyuk artıq komandamızda çalışır. Vadim Şturbavinin isə (hazırda yetirməsi Almaniya yığmasında çıxış edir) isə yanvardan yığmamızda fəaliyyəti planlaşdırılır. Gələcəkdə nəticələrin yüksək olacağını gözləyirik. Təqvim planında nəzərdə tutulan demək olar ki, bütün yarışlarda iştirak edir, qılıncoynadanlarımızın ustalığını artırır, komandamızın səviyyəsini yüksəldirik. İdmançılarımız mütəmadi olaraq Rusiya, Ukrayna və Türkiyədə təlim-məşq toplanışlarında iştirak edirlər. Bir ay bundan əvvəl Zağulbadakı bazamızda təlim-məşqlərə İraq komandası da qatılmışdı. Orta məktəblər, uşaq-gənclər idman məktəbləri ilə sıx əlaqədə işləyirik. 10-11 yaşdan yuxarı uşaq və yeniyetmələr bu idman növünün sirlərinə bölmələrdə ödənişsiz yiyələnə bilərlər. Vaxtilə Azərbaycan qılıncoynatma məktəbi İlqar Məmmədov, Boris Koretski kimi dünya şöhrətli qılıncoynadanlar yetişdirib. Hazırda Rusiya, Amerika, Belarus, Ukrayna, Türkiyə, Honkonq və digər ölkələrdə baş məşqçi və məşqçi kimi fəaliyyət göstərən azərbaycanlı idman ustaları dünyada qılıncoynatmanın inkişafına böyük töhfələr verirlər”.
Qılıncoynatmanın inkişafı istiqamətində görülən işlər davam etdirilir
Çingiz Mustafayev ölkəmizdə idmanın bu növünün inkişafı üçün güclü maddi-texniki bazanın yaradıldığını da qeyd edib. Azərbaycan Texniki Universitetin İdman Sarayında müasir standartlara cavab verən 2, ümumilikdə isə köhnə məşq zalı da nəzərə alınmaqla 3 zal qılıncoynadanlarımızın ixtiyarındadır. Bölgələrdə də qılıncoynatmanın inkişaf perspektivlərinə toxunan Ç.Mustafayev gələn ildən Sumqayıt və Gəncədə də bu idman növü üzrə bölmələrin açılacağını qeyd edib. O, bu il keçirilən yarışlarda komandamızın uğurlu nəticələrindən də söhbət açıb. Bildirib ki, qılıncoynadanlarımızın nəticələri getdikcə yaxşılaşır.
Baş məşqçi sablya və şpaqa ilə yanaşı, bir müddət durğunluq yaşanan rapirada da əməli işlərin görüldüyünü bildirib: “Bu növ Azərbaycanda bir vaxtlar çox məşhur olub. İlqar Məmmədov və Boris Koretski məhz rapira üzrə yarışlarda Olimpiya çempionu olublar. Hazırda 25 gənc rapiraçıdan ibarət komandamızın hazırlığını yüksəltmək üçün görülən işləri davam etdiririk”.
Çingiz Mustafayev ilin son aylarında qılıncoynadanlarımızı ciddi sınaq gözlədiyini deyib. O, bu yarışlarda təmsilçilərimizin ümidləri doğruldacaqlarına inandığını bildirib: “Şpaqaçılarımız noyabrın 17-18-də Latviyanın paytaxtı Riqada gənclər arasında dünya kuboku, noyabrın 23-25-də İsveçrənin Bern şəhərində böyüklər arasında Qran-Prinin fərdi və komanda yarışlarında iştirak edəcəklər. Gənc şpaqaçılar artıq sabahdan, böyüklərdən ibarət yığma isə noyabrın 10-dan yarışlara hazırlıq məqsədilə Moskvada təlim-məşqlərə qatılacaqlar.
Sablya üzrə noyabrın 9-da Fransanın Orlean şəhərində qadınlar arasında dünya kuboku keçiriləcək. Hazırda yığma komanda Ukraynada təlim-məşq toplanışındadır. Təlim-məşqlər ötən ayın 24-dən başlayıb və yığmamızla birgə Türkiyə idmançıları orada iştirak edirlər. Noyabrın 10-11-də İstanbulda oğlanlar və qızlar arasında EFC Kadet Sirkuit yarışında fərdi hesabda üç oğlan, iki qız, komanda yarışında üç oğlan idmançımız mübarizə aparacaq. Noyabrın 16-da isə təmsilçilərimiz Sofiyada U-14 Avropa Kadet Sirkuit yarışında güclərini sınayacaqlar. Həmin yarışlara hazırlıq məqsədilə 9 nəfərdən ibarət yığma komanda noyabrın 1-dən 8-dək Ankarada təlim-məşq toplanışında iştirak edirlər. İstanbul və Sofiya şəhərlərində keçiriləcək yarışlarda qılıncoynadanlarımızdan əlavə hakimimiz Erol Həsənli də iş başında olacaq.
Noyabrın 24-25-də isə gənc sablyaçılarımız bu ilin ən mühüm yarışlarından olan və Tehranda keçiriləcək dünya kubokunda iştirak edəcəklər. Ümid edirik ki, təmsilçilərimiz öz potensiallarından maksimum istifadə edib göstərilən etimadı doğruldacaqlar”.
Bölmənin digər xəbərləri
