Ankara, 13 mart, AZƏRTAC

Azərbaycan Milli Elmlər Akademiyasının Gəncə Bölməsi, Türkiyədəki və Özbəkistandakı səfirliklərimizin nəzdindəki Azərbaycan Mədəniyyət mərkəzlərinin birgə layihəsi ilə Türk dünyasının böyük mütəfəkkiri, dahi Azərbaycan şairi Nizami Gəncəvinin anım gününə həsr olunan “Nizami Gəncəvi və Gəncə” mövzusunda beynəlxalq onlayn vebinar keçirilib.

AZƏRTAC xəbər verir ki, AMEA-nın Gəncə Bölməsinin elmi işlər üzrə sədr müavini, Əlimuxtar Muxtarovun moderatorluğu ilə keçirilən tədbirdə Nizami fəlsəfəsinin bəşəri tutumu, eləcə də dünyada tanınan dahi şairin doğma yurdu, milli ruhumuzun aynası olan Gəncə və onun mənəvi mühiti barədə məlumat verilib.

Tədbirdə AMEA-nın Gəncə Bölməsinin sədri, akademik Fuad Əliyev vebinarı açaraq dahi Azərbaycan şairi və mütəfəkkiri Nizami Gəncəvinin anım gününə həsr olunan beynəlxalq tədbirin iştirakçılarını Gəncə ziyalıları adından salamlayıb. O, yüzlərlə, minlərlə kilometr məsafələri birləşdirərən bu beynəlxalq görüşün dahi şairin yaradıcılığı, əsərlərində bəşəriyyətə çatdırdığı və bu gün də aktual olan humanist ideyalarının işığında keçirildiyini diqqətə çatdırıb.

AMEA-nın prezidenti, akademik İsa Həbibbəyli dahi mütəfəkkir Nizami Gəncəvinin doğma yurdunda bu xeyirxah və elmi baxımdan dəyərli tədbir təşkil edildiyinə görə təşəkkürünü bildirib, Nizami Gəncəvi şəxsiyyəti, onun Azərbaycan, Türk dünyası ədəbiyyatına verdiyi töhfələrdən danışıb, Azərbaycanda və dünyada Nizami Gəncəvi irsinin tədqiqi və təbliği ilə bağlı layihələrdən danışıb. O, bu sahədə Ulu Öndər Heydər Əliyevin ədəbiyyat siyasətində böyük Azərbaycan şairi Nizami Gəncəvinin həyatı və yaradıcılığının tədqiq və təbliğ olunması, dünya miqyasında tanıdılması məsələləri geniş yer tutduğunu xüsusi vurğulayıb.

Azərbaycanda Atatürk Mərkəzinin müdiri, akademik Nizami Cəfərov da çıxış edərək, Nizami Gəncəvi irsinin dünyada daha çox tanıdılmasının əhəmiyyətindən danışıb.

Azərbaycan Dövlət Pedaqoji Universitetinin Beynəlxalq Əlaqələr üzrə prorektoru, filologiya elmləri doktoru, professor Mahirə Hüseynova çıxışında bu cür tədbirləri alimlərimizin digər ölkələrdəki həmkar və həmfikirləri ilə səmərəli əlaqələrinin nümunəsi kimi dəyərləndirib.

Türkiyədəki Azərbaycan Mədəniyyət Mərkəzinin direktoru Samir Abbasov qardaş ölkədə Nizami Gəncəvi irsinin tədqiqi və təbliği ilə bağlı reallaşdırılan layihələrdən danışıb. O, Azərbaycan Prezidentinin Sərəncamı ilə ölkəmizdə 2021-ci ilin “Nizami Gəncəvi ili” elan olunmasını və bu məqsədlə geniş coğrafiyada Nizami Gəncəviyə dair mühüm tədbirlərin keçirildiyini bildirib.

Samir Abbasov, Azərbaycan Respublikasının Mədəniyyət Nazirliyinin dəstəyi ilə xarici ölkələrdəki Azərbaycan Mədəniyyət mərkəzlərinin klassik irsimizin tədqiqi, dünya dillərinə tərcüməsi və daha geniş tanıdılması istiqamətində işlər həyata keçirdiklərini vurğulayaraq, hazırda Azərbaycan Mədəniyyət Mərkəzinin layihəsi ilə Nizami Gəncəvinin “Xəmsə”sinin Türkiyə Türkcəsinə tərcümə olunduğunu qeyd edib. S.Abbasov tək ədəbiyyatda deyil, mədəniyyətin bütün sahələrində dahi Nizami Gəncəvinin irsinin təbliğinin əhəmiyyətli olduğunu bildirib.

Özbəkistandakı Heydər Əliyev adına Azərbaycan Mədəniyyət Mərkəzinin direktoru, tarix üzrə fəlsəfə doktoru Akif Marifli də çıxışında Azərbaycanın tanınmış şəxsiyyətlərinin, klassik irsinin qardaş Özbəkistanda böyük maraqla qarşılandığını, xüsusən Nizami Gəncəvi və özünü onun mənəvi şagirdi hesab etmiş Əlişir Nəvainin yaradıcılıq və fəlsəfi dünyasının dərindən öyrənildiyinə diqqət çəkib.

Sonra vebinarın məruzələri dinlənilib.

Kəşmir Universitetinin professoru Naseem Ahmad Shah, Ərzurum Atatürk Universitetinin professoru Nimet Yıldırım, Özbəkistan Əlişir Nəvai adına Özbək Dili və Ədəbiyyatı Universitetinin professoru Nurbay Cabbarov, İstanbul Yıldız Texnik Universitetinin professoru Süleyman Doğan, Daşkənd Dövlət Özbək Dili və Ədəbiyyatı Universitetinin baş müəllimi, filologiya elmləri doktoru Gülbahar Aşurova, Təbriz Universitetinin professoru Sədyar Vəzifə (Eloğlu), AMEA Nizami Gəncəvi adına Ədəbiyyat İnstitutunun “Nizamişünaslıq” şöbəsinin dosenti Zəhra Allahverdiyeva, Əlyazmalar İnstitutunun böyük elmi işçisi Rauf Şeyxzamanlı, Qarabağ Universitetinin Filologiya kafedrasının müdiri, filologiya elmləri doktoru Əzizağa Nəcəfzadə və AMEA Gəncə Bölməsinin Beynəlxalq Əlaqələr şöbəsinin müdiri Simuzər Qafarlı çıxış ediblər.

Sonda iştirakçılar Nizami Gəncəvinin irsinin öyrənilməsi, tədqiqi, təbliği, eləcə də dahi şairin həyatı ilə bağlı əlamətdar tarixlərin ölkəmizdə və xaricdəki Azərbaycan təşkilatları tərəfindən ardıcıl olaraq qeyd olunması, daim bu istiqamətdə layihələrin reallaşdırılmasına dair razılığa gəliblər.

Ramin Abdullayev

AZƏRTAC-ın xüsusi müxbiri

Ankara