DAİMİ KOMİSSİYANIN İCLASINDA
AZƏRTAC xəbər verir ki, Milli Məclisin sosial siyasət daimi komissiyasının oktyabrın 11-də keçirilmiş iclasında “Dərman vasitələri haqqında” qanun layihəsi müzakirə olunmuşdur. Komissiyanın sədri Hadi Rəcəbli demişdir ki, dərman vasitələri ilə bağlı qüvvədə olan qanun günün tələblərinə cavab vermədiyi üçün yeni qanun layihəsi hazırlanmışdır. Layihə artıq bir dəfə parlamentdə müzakirə olunmuş, işçi qrupu tərəfindən irad və təkliflərin bəziləri nəzərə alınmışdır. Sonra komissiya sədrinin müavini Musa Quliyev layihə ilə bağlı ətraflı məlumat vermişdir. Bildirmişdir ki, işçi qrupu Səhiyyə, Ədliyyə və Maliyyə nazirlikləri, eləcə də digər əlaqədar təşkilatlarla birgə işləyərək mükəmməl sənəd hazırlamışdır. Birinci oxunuşdan sonra layihənin bəzi müddəalarına dəyişikliklər edilmiş, yeni bəndlər əlavə olunmuş və sənəd tam təkmilləşdirilmişdir. Bu qanun Azərbaycan Respublikasında dərman vasitələri ilə davranışın hüquqi və təşkilati əsaslarını müəyyən edir, bu sahədə yaranan münasibətləri tənzimləyir.
Sonda qanun layihəsi Milli Məclisin müzakirəsinə tövsiyə olunmuşdur.
Bölmənin digər xəbərləri
