SİYASƏT
Daxili Köçürülmə üzrə Monitorinq Mərkəzinin nümayəndə heyəti Cocuq Mərcanlıda olub
![](/files/galleryphoto/2019/2/1200x630/15568147082758315931_1200x630.jpg)
![](/files/galleryphoto/2019/2/1200x630/15568147085073756967_1200x630.jpg)
![](/files/galleryphoto/2019/2/1200x630/15568147086220946163_1200x630.jpg)
Bakı, 2 may, AZƏRTAC
Daxili Köçürülmə üzrə Monitorinq Mərkəzinin ölkəmizdə səfərdə olan direktoru Aleksandra Bilak başçılıq etdiyi nümayəndə heyəti ilə birgə Cəbrayıl rayonunun Cocuq Mərcanlı kəndində olub.
Bu barədə AZƏRTAC-a Qaçqınların və Məcburi Köçkünlərin İşləri üzrə Dövlət Komitəsindən məlumat verilib.
Qonaqlara məlumat verən Dövlət Komitəsi sədrinin müavini Fuad Hüseynov bildirib ki, 1994-cü ilin yanvarında Cocuq Mərcanlı kəndi Horadiz əməliyyatı nəticəsində azad olunsa da, Lələtəpə yüksəkliyində mövqe tutmuş ermənilər insanların burada yaşamasına, təsərrüfat fəaliyyəti ilə məşğul olmalarına imkan vermirdilər. 2016-cı ilin aprel döyüşlərində yüksəkliyin azad olunması ilə kəndə qarşı təhlükə aradan qalxdı.
Prezident İlham Əliyevin tapşırığı ilə həyata keçirilmiş bərpa-quruculuq işləri barədə qonaqlara ətraflı məlumat verən Fuad Hüseynov qeyd edib ki, respublikamızın müxtəlif yerlərində müvəqqəti məskunlaşmış sakinlər artıq öz ata-baba yurdlarına qayıdaraq burada təhlükəsiz şəraitdə yaşayırlar. Cocuq Mərcanlıya qayıdış işğal altındakı digər ərazilərin də tezliklə işğaldan azad ediləcəyinə və “Böyük Qayıdış”ın başlanacağına ümid və inam yaradıb.
Qonaqlara kəndə qayıtmış əhalinin sosial-iqtisadi vəziyyəti, məşğulluğunun təmin edilməsi üçün həyata keçirilən tədbirlər barədə də məlumat verilib. Qeyd edilib ki, burada iş yerlərinin yaradılması məqsədilə yerli və xarici təşkilatlar tərəfindən layihələr həyata keçirilir.
Daha sonra qonaqlar Cocuq Mərcanlı sakini Oqtay Həziyevin evində olublar. O qeyd edib ki, ulu öndər Heydər Əliyevin rəhbərliyi ilə hələ 1994-cü ildə aparılan uğurlu Horadiz əməliyyatından sonra Cocuq Mərcanlı kəndi işğaldan azad edilsə də, kənd işğalçı qüvvələrin yaxın məsafədəki mövqelərindən daim atəşə tutulurdu. Aprel döyüşləri nəticəsində təcavüzkarlar geri çəkilməyə məcbur edildilər. Hazırda müasir üslubda bərpa olunan kənddə rahat yaşayış üçün hər cür şərait yaradılıb.
Qonaqlar Cocuq Mərcanlıda inşa edilmiş Şuşa məscidinin bənzəri olan məscidə və digər infrastruktur obyektlərinə baş çəkib, yerli icma nümayəndələri ilə görüşüblər. Səfərdə Daxili Köçürülmə üzrə Monitorinq Mərkəzinin direktorunun köməkçisi Hacen Məhəmmədi, Azərbaycan Respublikasının Cenevrədəki BMT Bölməsində və digər beynəlxalq təşkilatlar yanında daimi nümayəndəsi Vaqif Sadıqov, onun müşaviri Seymur Mərdəliyev və başqaları iştirak ediblər.
Daxili Köçürülmə üzrə Monitorinq Mərkəzinin direktoru Aleksandra Bilak Cocuq Mərcanlıda aparılan işləri yüksək qiymətləndirib, azərbaycanlı məcburi köçkünlərin məruz qaldığı humanitar faciənin dünya ictimaiyyətinə çatdırılması üçün mühüm tədbirlər görülməsinin vacibliyini qeyd edib, səfərin təşkilinə görə təşəkkürünü bildirib.