Deputat: Kəlbəcərin hərbi-siyasi yolla işğaldan azad olunması Azərbaycanın böyük diplomatik qələbəsidir
Bakı, 25 noyabr, AZƏRTAC
Azərbaycan xalqı böyük sevinc və fərəh hissi ilə Kəlbəcər rayonunun işğaldan azad olunmasının birinci ildönümünü qeyd edir. Respublikamızın əsrarəngiz guşələrindən olan Kəlbəcər üçtərəfli Bəyanatın şərtlərinə əsasən 2020-ci il noyabrın 25-də ermənilər tərəfindən boşaldıldı. Azərbaycan bununla hərbi-siyasi yolla beynəlxalq hüququn aliliyini və tarixi ədaləti bərpa etdi. Bəyanatın şərtlərinə əsasən, Ağdam, Kəlbəcər və Laçın rayonlarının hərbi-siyasi yolla işğaldan azad olunması Azərbaycanın böyük diplomatik qələbəsidir.
Bunu AZƏRTAC-a açıqlamasında Milli Məclisin deputatı Tamam Cəfərova deyib.
Deputat bildirib ki, Kəlbəcər rayonu 1993-cü il aprelin 2-də Ermənistan silahlı birləşmələri tərəfindən işğal edilmişdi. İşğal nəticəsində 511 dinc sakin öldürülmüş, 321 adam əsir götürülmüş və itkin düşmüş, həmçinin Kəlbəcərin 60 min sakini respublikanın 56 rayonunun 770 yaşayış məntəqəsində müvəqqəti məskunlaşmağa məcbur olmuşdur. Erməni vandalları tərəfindən Kəlbəcərin onlarla tarixi-mədəniyyət abidəsi, sosial infrastrukturu dağıdılmış və rayonun milyardlarla manatlıq sərvəti Ermənistana daşınıb. Hətta mənfur düşmən üçtərəfli Bəyanatın şərtlərinə uyğun olaraq Kəlbəcər rayonunu tərk edərkən 1992-ci ildə olduğu kimi, vandallığından əl çəkmədi, öz barbarlığını nümayiş etdirdi.
“Ermənilər Kəlbəcəri tərk edərkən evləri yandırır, infrastrukturu dağıdır, meşələrə od vurur, ağacları kütləvi şəkildə kəsərək yük maşınları ilə Ermənistana daşıyırdılar. Faktiki olaraq Ermənistan dünyanın gözü qarşısında Azərbaycan təbiətinə qarşı ekoloji terror törətdi. Əminliklə deyə bilərik ki, Azərbaycan Ermənistan üzərində qazandığı böyük Qələbə nəticəsində tarixi torpaqlarımızı işğaldan azad etməklə yanaşı, erməni faşizminə də qalib gəldi. Bu fikirləri Prezident İlham Əliyev də çıxışlarında dəfələrlə ifadə edib. Həqiqətən, ermənilərin insanlara, təbiətə qarşı törətdikləri vəhşiliklər, barbarlıq heç bir insanlığa sığmır”, - deyə deputat bildirib.
Kəlbəcər rayonunda həyata keçirilən işlərə diqqət çəkən T.Cəfərova qeyd edib ki, erməni vandallarının törətdiyi bütün cinayətlərə baxmayaraq, Kəlbəcər rayonunda bərpa-yenidənqurma işlərinə artıq start verilib. İşğaldan azad olunmuş ərazilərdə fərqli təyinatlı infrastruktur layihələri reallaşdırılır. Bu il avqustun 16-da dövlətimizin başçısı Toğanalı-Kəlbəcər avtomobil yolu üzərində Murovdağda inşa olunacaq tunelin təməlini qoyub. Beləliklə, Göygöl və Kəlbəcər rayonlarını yeni yol birləşdirəcək. Daha sonra “Kəlbəcər-1” Kiçik Su Elektrik Yarımstansiyasında görülən işlərlə tanışlıq olub, 110/35/10 kilovoltluq “Kəlbəcər” yarımstansiyasının açılışı edilib. Səfər çərçivəsində Kəlbəcər-Laçın avtomobil yolu üzərində inşa olunacaq tunelin təməli qoyulub.
“Əminliklə deyə bilərik ki, işğaldan azad olunmuş digər ərazilərimizdə olduğu kimi Kəlbəcərdə də yenidən həyat öz axarına qayıdacaq və Şərqi Zəngəzur iqtisadi rayonunun mühüm mərkəzlərindən birinə çevriləcək”, - deyə deputat fikirlərini yekunlaşdırıb.
Bölmənin digər xəbərləri
