DİM Kembricin TKT imtahanını təşkil edəcək
Bakı, 23 avqust, AZƏRTAC
Kembric Universiteti Nəşriyyat və Qiymətləndirmə qurumunun rəsmi test mərkəzi olan Dövlət İmtahan Mərkəzi (DİM) avqustun 27-də ingilis dili müəllimləri üçün bilik və bacarıqları beynəlxalq səviyyədə təsdiq edən TKT (Teaching Knowledge Test) kvalifikasiyasının modulları üzrə imtahan keçirəcək.
DİM-dən AZƏRTAC-a bildirilib ki, imtahan TKT Modul 1, TKT Modul 2, TKT Modul 3, TKT Modul YL (Young Learners - azyaşlı öyrənənlərə dilin tədrisi), TKT Modul CLIL (Content and Language Integrated Learning - dilin məzmunla inteqrativ tədrisi) üzrə təşkil ediləcək. Kağız əsaslı TKT imtahanı avqustun 27-də saat 09:00-da DİM-in Akademik Həsən Əliyev küçəsi, 299 ünvanında yerləşən inzibati binasında keçiriləcək.
İmtahan iştirakçıları avqustun 27-si saat 08:00-dən gec olmayaraq şəxsiyyət vəsiqəsi və ya ümumvətəndaş pasportu, həmçinin imtahanda iştirak üçün təsdiq sənədi ilə birlikdə imtahanın keçiriləcəyi müvafiq binada olmalıdırlar.
Kembric imtahanları barədə ətraflı məlumat DİM-in saytında yerləşdirilib. Əlavə məlumat üçün [email protected] ünvanına yazmaq olar.
Bölmənin digər xəbərləri
