Dmitri Peskov: Rusiya ilə ABŞ arasında elə bir ticarət əlaqəsi yoxdur
Moskva, 4 aprel, AZƏRTAC
Praktiki olaraq, Rusiya ilə ABŞ arasında heç bir ticarət və iqtisadi əlaqələr yoxdur.
AZƏRTAC xəbər verir ki, bunu Rusiya Prezidentinin mətbuat katibi Dmitri Peskov ABŞ-ın demək olar ki, bütün xarici məhsullara yüksək gömrük rüsumları tətbiq etmək qərarını şərh edərkən deyib.
D.Peskovun sözlərinə görə, Rusiya yeni rüsumların tətbiq olunduğu ölkələr siyahısına daxil edilməyib, çünki Birləşmiş Ştatlarla bu kontekstdə rəqəmlə ifadə olunacaq ticarət münasibətləri yoxdur. O vurğulayıb ki, mahiyyət etibarilə hazırda iki ölkə arasında heç bir ticarət və iqtisadi əlaqələr mövcud deyil.
Xatırladaq ki, ABŞ Prezidenti Donald Tramp 185 ölkə və ərazinin məhsullarına gömrük rüsumunun tətbiq ediləcəyini açıqlamışdı. Aprelin 5-də universal 10 faizlik tariflər, aprelin 9-da isə bir sıra ölkələr üçün fərdi, artırılmış tariflər qüvvəyə minəcək. ABŞ-da bütün idxal olunan avtomobillərə 25 faizlik rüsum artıq qüvvəyə minib. Bu qərarlarda Rusiyanın adı çəkilmir, çünki Ağ evin də izah etdiyi kimi, artıq qüvvədə olan sanksiyalar Rusiya Federasiyası ilə ticarəti minimuma endirib.
Rusiya Prezidentinin mətbuat katibi İranın nüvə dosyesi mövzusuna da toxunub. O vurğulayıb ki, bütün tərəflər mütləq təmkinli olmalı, İranın nüvə proqramı problemi müstəsna olaraq siyasi və diplomatik yollarla həll edilməlidir.
Kremlin sözçüsü, həmçinin bəyan edib ki, ABŞ-la münasibətlərdə ehtiyatlı nikbinlik var ki, bu da başqa şeylərlə yanaşı, Prezidentin iqtisadi əməkdaşlıq üzrə xüsusi nümayəndəsi Kirill Dmitriyevin fəaliyyəti ilə asanlaşdırılır. Onun sözlərinə görə, işlər müxtəlif kanallarla davam edir.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
