DÖVLƏT MÜƏSSİSƏLƏRİ VƏ OBYEKTLƏRİNİN BAZASINDA 1443 SƏHMDAR CƏMİYYƏTİ YARADILMIŞDIR
Dövlət müəssisələrinin səhmdar cəmiyyətlərinə çevrilməsi onların özəlləşdirilməsi prosesində ilkin mərhələ kimi xüsusi əhəmiyyət kəsb edir.
İqtisadi İnkişaf Nazirliyinin dövlət əmlakının özəlləşdirilməsi departamenti dövlət müəssisələrinin bazasında səhmdar cəmiyyətlərinin yaradılması, eləcə də onların özəlləşdirilməsi sahəsində xeyli iş görmüş, qanunvericilikdə nəzərdə tutulmuş tədbirlərin həyata keçirilməsini davam etdirmişdir.
Nazirlikdən AZƏRTAC-a bildirmişlər ki, 2002-ci ilin 10 ayı ərzində dövlət müəssisələrinin bazasında 73 səhmdar cəmiyyəti təsis olunmuşdur. Ümumiyyətlə, indiyədək dövlət müəssisə və obyektlərinin bazasında 1443 səhmdar cəmiyyəti yaradılmışdır.
Ötən müddət ərzində 12 ixtisaslaşdırılmış çek, 44 pul hərracı keçirilmiş, 140-dan çox səhmdar cəmiyyətinin səhmləri satılmışdır. Bundan əlavə, 124 səhmdar cəmiyyətində əmək kollektivi üzvlərinə səhmlərin güzəştli satışı keçirilmişdir.
İndiyədək səhmdarlarının birinci ümumi yığıncağı keçirilməyən səhmdar cəmiyyətlərində, o cümlədən bu ilin ötən dövründə 126 səhmdar cəmiyyətində belə yığıncaqlar təşkil edilmişdir.
Birinci yığıncağı keçirilməyən səhmdar cəmiyyətlərində bu tədbirin keçirilməsi üçün departamentin yerli şöbələri ilə birgə müvafiq təşkilati işlər görülür və metodiki-praktiki kömək göstərilir.
Bölmənin digər xəbərləri
