Dövlətçilik ruhunda yetişən yeni nəsil siyasətçi: Biz həm müasirik, həm də milli – MÜSAHİBƏ
Bakı, 8 aprel, AZƏRTAC
Azərbaycanın ictimai-siyasi həyatında gənc və dinamik bir sima öz dəst-xəttini formalaşdırmaqdadır. Bu, Elvin Vəliyevdir. O, dövlətinə və xalqına sədaqətlə xidmət etməyə and içmiş milli dəyərlərimizin qoruyucusu olan gənc siyasətçidir. 2024-cü ildə Milli Məclisə keçirilən seçkilərdə deputatlığa ən gənc namizəd kimi iştirak etməsi onun siyasi iradəsinin və liderlik qabiliyyətinin bariz nümunəsidir. E.Vəliyev təkcə siyasətçi deyil, həm də ölkəmizin mədəni irsinin keşiyində dayanan, gənclər arasında milli ruhu aşılayan, Qərbi Azərbaycana qayıdış ideyasını yeni nəslin şüurunda dərinləşdirmək üçün yorulmadan çalışan ictimai fəaldır. Onun fikrincə, müasir Azərbaycan gəncliyi qlobal dünyada yerini tapmaqla yanaşı, öz milli kimliyinə də sahib çıxmalıdır. Prezident İlham Əliyevin siyasi kursunu və dövlətçilik fəlsəfəsini fəaliyyətində əsas tutan E.Vəliyev üçün dövlətə xidmət, sadəcə, vəzifə deyil, həyat missiyasıdır. O, “Biz həm müasirik, həm də milli” prinsipini ideoloji xətt kimi qəbul edərək ölkəmizə töhfə verməyə çalışır.
AZƏRTAC-ın “Azərbaycanın istedadları” rubrikasının budəfəki qonağı da E.Vəliyevdir. Onunla müsahibəni təqdim edirik.
- Siyasi fəallığa daha tez başlamağınız və bunun psixoloji, intellektual inkişafınıza təsiri barədə nə deyə bilərsiniz?
- Siyasi fəallığım Prezident İlham Əliyevin uzaqgörən və milli maraqlara söykənən siyasətinə əsaslanır. Dövlətimizin başçısının liderlik keyfiyyətləri, dövlətçilik uğrunda apardığı prinsipial və qətiyyətli mübarizə mənim də bu yolda ilk addımlar atmağıma səbəb olub, mənə yüksək məsuliyyət hissi və məqsədyönlü baxış qazandırıb. Liderlik qabiliyyətim isə məhz Prezidentimizin xalqına və dövlətinə olan sədaqətli xidmət modeli əsasında formalaşıb.
- Qərbi Azərbaycana qayıdış ideyasını gənclər arasında təbliğ etməyin strateji və mədəni tərəflərini necə müəyyənləşdirirsiniz? Bu ideyanın reallaşması üçün hansı sosial mexanizmləri təklif edirsiniz?
- Qərbi Azərbaycana qayıdış ideyası Prezident İlham Əliyevin iradəsi ilə dövlət siyasətinin mühüm istiqamətlərindən birinə çevrilib. Bu, bizim milli kimliyimizin, tarixi ədalətin bərpası və mədəni varlığımızın qorunması anlamına gəlir. Gənclər arasında bu ideyanın təbliği üçün, ilk növbədə, Prezidentin çıxışlarının, Qərbi Azərbaycan İcmasının fəaliyyətinin və dövlətimizin bu istiqamətdə gördüyü işlərin gənc nəslə düzgün və dolğun çatdırılması vacibdir. Sosial mexanizm kimi təlim proqramları, media layihələri və regionlara səfərlər vasitəsilə həm maarifləndirmə, həm də birbaşa iştirak təmin oluna bilər.
- Azərbaycan gənclərinin dövlətçilik ruhunda yetişməsi üçün təhsil və informasiya sistemində hansı yeniliklərə ehtiyac görürsünüz?
- Dövlətimizin başçısının rəhbərliyi ilə Azərbaycan təhsilində son illərdə böyük islahatlar aparılıb. Amma yenə də gənclərin dövlətçilik ruhunda formalaşması üçün bəzi işlər görülməlidir. Əsas məsələ təhsil və informasiya sistemində milli ideologiyanın, dövlətimizin başçısının siyasi kursunun və tarixi reallıqların gənclərə daha təsirli formada çatdırılmasıdır. İmkanlarımız isə böyükdür, dövlətimizin gənclərə göstərdiyi diqqət və dəstək sayəsində müvafiq tədbirləri həyata keçirmək üçün kifayət qədər resurs mövcuddur.
- Tarixi irsimizin qorunması və onun gələcək nəsillərə ötürülməsi məsələsində texnologiyanın və rəqəmsal medianın rolu barədə fikirləriniz nədən ibarətdir?
- Prezident İlham Əliyevin rəhbərliyi ilə həyata keçirilən “Rəqəmsal Azərbaycan” strategiyası çərçivəsində texnologiyanın və rəqəmsal medianın tarixi irsimizin qorunmasında rolu daha da artmaqdadır. Biz bu vasitələrlə tarixi abidələrimiz və mədəni irsimiz barədə məlumatları daha geniş auditoriyaya çatdıra və gənclərimizi milli-mənəvi dəyərlərlə tanış edə bilərik. Gənclərimizin rəqəmsal aləmdəki fəallığı bizə bu istiqamətdə geniş imkanlar təqdim edir və bunlardan yararlanmaq həm vətəndaşlıq borcumuz, həm də strateji vəzifəmizdir.
- Milli dəyərlərlə qloballaşma arasında balansı necə qorumaq olar? Bu məsələni Azərbaycan gəncləri üçün strateji çağırış kimi necə qiymətləndirirsiniz?
- Azərbaycan həm milli dəyərlərini qoruyan, həm də qlobal proseslərə uğurla inteqrasiya edən dövlətdir. Biz milli kimliyimizi qoruyaraq müasir dünyaya açıq ola bilərik. Bu baxımdan Prezidentimizin “Biz həm müasirik, həm də milli” prinsipi gənclər üçün ən güclü ideoloji istiqamətdir.
- Sizin kimi gənc siyasətçilərin ölkəmizə verə biləcəyi töhfələr barədə nə deyə bilərsiniz?
- Prezident İlham Əliyev dəfələrlə qeyd edib ki, gənclər dövlətin inkişafında ön sırada olmalıdırlar. Mənim kimi gənc siyasətçilər də bu çağırışa cavab verirlər. Yeni nəsil siyasətçilər cəmiyyətə yenilənmə, texnoloji düşüncə və daha dinamik idarəetmə üsulunu gətirirlər. Amma biz bunu edərkən Prezidentimizin siyasi kursuna, dövlətimizin milli maraqlarına sadiqliyimizi unutmuruq. Bu sadiqlik həm sabitliyin, həm də davamlı inkişafın təminatıdır.
Bölmənin digər xəbərləri
