DSMF Sinqapurda beynəlxalq müsabiqədə növbəti uğur qazanıb
Bakı, 9 aprel, AZƏRTAC
Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu (DSMF) növbəti beynəlxalq uğur qazanıb. Fond “GovInsider” qurumunun (Sinqapur) keçirdiyi “Festival of Innovation Awards 2025” beynəlxalq müsabiqəsinin qaliblərindən biri olub və Xüsusi Qeydli Mükəmməllik Sertifikatı ilə təltif edilib.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, mükafat DSMF-yə 14 ölkədən 700-dən çox nümayəndənin iştirakı ilə Sinqapur şəhərində təşkil olunmuş Beynəlxalq İnnovasiyalar Konfransında təqdim olunub.
Fond həmin mükafata son illər sosial sığorta və sosial təminat sahəsində ölkəmizdə aparılan islahatlar, sosial idarəçilikdə çeviklik və xidmət keyfiyyətinin artırılmasına görə layiq görülüb.
DSMF-nin adı qurumun rəsmi veb-səhifəsindəki qaliblər siyahısına daxil edilib.
Konfransda dövlət sektorunun transformasiyasına dair interaktiv sessiyalar keçirilib, ölkələrin bu istiqamətdə müəyyən etdikləri hədəflər haqqında fikir mübadiləsi aparılıb.
Bölmənin digər xəbərləri
