Edişer Qvenitadze: Gürcüstanda hakim partiya 4-cü dəfə seçkilərdə qalib gələcək
Tbilisi, 21 oktyabr, AZƏRTAC
“Hakim partiya 4-cü dəfə seçkilərdə qalib gələcək və bununla da kənar qüvvələrin Gürcüstana müdaxiləsi maksimal şəkildə sona çatacaq”.
Bu sözləri AZƏRTAC-a müsahibəsində gürcü ekspert Edişer Qvenitadze söyləyib. Onun sözlərinə görə, oktyabrın 26-da keçiriləcək parlament seçkiləri yalnız Gürcüstan üçün deyil, bütün region üçün olduqca mühümdür: “Bu, sadəcə, simpatiya-antipatiya yarışı və ya siyasi ideologiya yarışı deyil. Burada kənar qüvvələrin ölkədə hakimiyyəti dəyişmək cəhdi açıq-aydın görünür. Nəticə olaraq nə baş verəcəksə, bu yalnız Gürcüstana deyil, həm də bütün regiona öz təsirini göstərəcək”.
Ekspert bildirib ki, hazırkı hökumətin 12 illik səyləri nəticəsində Gürcüstanda sülh, dinc yaşam hökm sürür, sosial-iqtisadi və regional inkişaf hiss olunur. Gürcüstan Qafqazın vacib coğrafi hissəsidir və bölgədə sülh nöqteyi-nəzərindən mühüm rol oynayır: "Təəssüflər olsun ki, ölkə müəyyən kənar qüvvələrin bizə ötürdükləri mənfi təsirlərlə qarşı-qarşıyadır. Amma düşünürəm ki, hakim partiya 4-cü dəfə seçkilərdə qalib gələcək və bununla da kənar qüvvələrin müdaxiləsi maksimal şəkildə sona çatacaq. Mənim müşahidələrim belə deməyə əsas verir".
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
