Moskva, 12 dekabr (AZƏRTAC). Moskvada Azərbaycan Respublikasının Rusiya Federasiyasındakı səfirliyinin, Heydər Əliyev Fondunun Rusiya nümayəndəliyinin və Rusiyanın Azərbaycanlı Gənclər Təşkilatının (RAGT) birgə təşəbbüsü ilə Azərbaycan xalqının ümummilli lideri, ulu öndər Heydər Əliyevin xatirə gününə həsr olunmuş tədbir keçirilmişdir. Rusiyada yaşayan azərbaycanlı tələbələr və gənclər qarşısında çıxış etmək üçün tədbirə Azərbaycanın tanınmış yazıçı-publisisti, ictimai xadimi, ümummilli liderin həyat və fəaliyyəti barədə çoxsaylı kitabların və tədqiqat əsərlərinin, “Heydər Əliyev. Şəxsiyyət və zaman” dördcildliyinin müəllifi, Milli Məclisin deputatı Elmira Axundova dəvət olunmuşdur.

Əvvəlcə ulu öndərin səfirliyin binasındakı barelyefi qarşısına əklil qoyuldu, onun xatirəsi bir dəqiqəlik sükutla anıldı.

Azərbaycanın Rusiyadakı səfiri Polad Bülbüloğlu tədbiri açaraq bildirdi ki, Heydər Əliyev böyük lider və müasir Azərbaycanın memarıdır. Səfir dedi ki, ona on il Heydər Əliyevlə işləmək və bu böyük şəxsiyyətdən, böyük insandan dərs almaq, həyat təcrübəsi öyrənmək səadəti nəsib olmuşdur. Heydər Əliyev həmişə və istənilən vəziyyətdə istedadlı gəncləri dəstəkləmək üçün real imkanlar tapmışdır. O xüsusi vurğuladı ki, hamı Heydər Əliyevdən öyrənirdi, çünki Heydər Əliyev şəxsiyyəti formalaşdıran, insanı formalaşdıran, ona oxumaq və gələcəkdə düzgün qərarlar qəbul etmək imkanı verən bir məktəbdir.

Səfir demişdir ki, Heydər Əliyev, həmçinin dövrün mürəkkəbliyinə, Rusiyanın birinci Prezidenti Boris Yeltsinlə münasibətlərin heç də sadə olmamasına baxmayaraq, müasir Rusiya və suveren Azərbaycan arasında münasibətlərin memarı olmuşdur. Səfir vurğulamışdır: “Peşəkar diplomat, Moskva Dövlət Beynəlxalq Münasibətlər İnstitutu kimi çox gözəl ali məktəbin məzunu, Azərbaycanın Prezidenti İlham Əliyev ölkəmizin milli maraqlarının diktə etdiyi hər bir addımını çox dəqiq ölçüb-biçir və respublikamızın beynəlxalq səviyyədə yerini çox düzgün müəyyən edir”. Səfirin fikrincə, o vaxt müstəqil Azərbaycanın daxili və xarici siyasət strategiyasının qurulması, xüsusən Ermənistanın Azərbaycana təcavüzü və qüvvələrin qeyri-bərabər olması baxımından və Heydər Əliyevdən böyük cəsarət, yüksək peşəkarlıq, böyük vətəndaşlıq məsuliyyəti tələb edirdi. Diplomat sonda demişdir: “Heydər Əliyev insanları, milləti və respublikanı birləşdirərək, Azərbaycanı 1993-cü ildə düşdüyü böhranlı vəziyyətdən çıxara bildi”.

Ulu öndərin həyat və fəaliyyəti barədə nadir tədqiqat əsərinin müəllifi Elmira Axundova çıxışının əvvəlində bildirdi ki, səfirliyin konfrans salonuna toplaşmış auditoriyanın gənclərdən ibarət olduğunu nəzərə alaraq Heydər Əliyev şəxsiyyətinin təşəkkülündən, liderlərin necə yetişməsindən, ulu öndərin fenomenini onun xarakterinin hansı xüsusiyyətlərinin şərtləndirdiyindən söz açacaqdır. O dedi: “Heydər adının mənası öndə gedən igid deməkdir və çox vaxt ad insanın taleyini müəyyən edir”.

E.Axundova Heydər Əliyevin nəsil şəcərəsinə qısa ekskurs edərək bildirdi ki, onda liderlik keyfiyyətləri hələ uşaq ikən özünü büruzə vermişdir və o, qeyri-adi şəxsiyyət kimi formalaşanadək həmişə hər yerdə - həm təhsildə, həm idmanda, həm teatra olan həvəsdə, gördüyü hər bir işdə birinci olmuşdur. 1 nömrəli beynəlmiləl məktəbin Azərbaycan bölməsində təhsil alan Heydər Əliyev rus dilini müstəqil öyrənməyə başlamış, həmişə rus bölməsindəki yaşıdları ilə ünsiyyətə can atmış, rus dilində saysız-hesabsız bədii ədəbiyyat oxumuşdur.

Yazıçı, həmçinin Heydər Əliyevin maraq göstərdiyi əsas sahələrdən biri olan teatrdan danışaraq dedi: “Ulu öndər teatra və teatr sənətinə məhəbbətinə bütün ömrü boyu sadiq qalmış, teatr xadimlərinə və sənət adamlarına həmişə hamilik etmişdir. Teatr siyasi xadim Heydər Əliyevə çox şey vermişdir. Onun çox vaxt improvizəyə söykənən bənzərsiz çıxışlarını, gözəl diksiyasını, şux görkəmini, “hollivud” təbəssümünü hamı vurğulayırdı: dostları və xeyirxahları heyranlıqla, xarici mətbuat təəccüblə, əyalətçilikdən qurtula bilməyən baş katib Qorbaçov başda olmaqla sovet Siyasi Bürosunun yöndəmsiz və qaraqabaq üzvləri isə həsədlə”.

Hələ məktəb illərində hamının lider kimi qəbul etdiyi Heydər Əliyevi həmişə başqa şagirdlərə örnək göstərilməsindən ətraflı söhbət açan yazıçı bildirdi ki, bu fikirlə hamı razılaşırdı. Gəncin əsgəri duruşu, idmançı görkəmi, dözümlülüyü bədən tərbiyəsi və hərbi təlim müəllimlərini həmişə heyran qoyurdu. Sinif yoldaşlarının danışdıqlarına görə, hərbi təlim rəhbəri Akim Abbasov həmişə ona deyirdi: “Sənin böyük gələcəyin var, general olacaqsan”. Yeri gəlmişkən, günlərin bir günü məktəbə atasının kitelində gəldikdən sonra Heydər Əliyevi çox vaxt “general” deyə çağırırdılar.

Ümummilli liderin gənclik illərindən bir çox digər maraqlı epizodlardan gənclərə söz açan E.Axundova qeyd etdi ki, Heydər Əliyev lider olmaq istəyənlər üçün əla örnəkdir. E.Axundova sonda dedi: “Liderlik Heydər Əliyevin alın yazısı idi. Onun bütün xarakteri lider xarakteri idi. Tale onu dəfələrlə sınağa çəkmiş, lakin o, hər bir sınağın odundan-alovundan Səməndər quşutək cəsarətlə çıxmış və daha yüksəklərə qalxmışdır. O demək olar, həmişə zəfər çalırdı. Lakin uğursuzluqlar da olurdu. O, bu uğursuzluqlara elə cəsarətlə sinə gərirdi ki, son nəticədə hər şey onun xeyrinə qurtarırdı. Ən başlıcası isə tarixi missiyasını - Azərbaycanı xilas etmək missiyasını həyata keçirdi”.

Bakı Slavyan Universitetinin rektoru, professor Kamal Abdullayev Azərbaycan xalqının ümummilli lideri Heydər Əliyev ilə görüşlərini, o cümlədən Heydər Əliyevin ali məktəblərin rektorları və qəbul imtahanlarında daha çox bal toplamış abituriyentlərlə görüşünü yada saldı. Həmin görüşdə Heydər Əliyev demişdi: “Gənclər bizim gələcəyimiz, bizim sərvətimizdir. Bu, mənim sizin hamınıza vəsiyyətimdir”.

Onun sözlərinə görə, gənclərə gözəl münasibət bəsləyən Heydər Əliyev həm dövlətin, həm də ayrılıqda götürülmüş hər bir insanın perspektivlərini açıq-aydın görən ürəyi geniş, qəlbi açıq insan idi. Heydər Əliyev arzu edirdi ki, Azərbaycan tamamilə müstəqil, çiçəklənən bir ölkə olsun, hər yerdə Azərbaycan haqqında danışsınlar və o, dünya birliyinin ölkələri arasında layiqli yer tutsun. İndi bütün bunlar gözlərimiz qarşısında baş verir. BSU-nun rektoru bildirdi ki, Rusiya paytaxtına, həmçinin Moskva Dövlət Dilçilik Universitetinin 80 illik yubileyi münasibətilə gəlmişdir. Bu universitetin nəzdində dörd il əvvəl azərbaycanşünaslar hazırlayan Azərbaycan Dili və Mədəniyyəti Mərkəzi açılmışdır və fəaliyyət göstərir. K.Abdullayev dedi ki, bundan əvvəl Berlində olmuşdur. Humbold adına Berlin Dövlət Universitetində Azərbaycan Tarixi Mərkəzi açılmışdır. Berlindən Minskə gedərək Belarus Dövlət Pedaqoji Universitetində Azərbaycan Dili və Mədəniyyəti Mərkəzinin açılışında iştirak etmişdir. BSU-nun rektorunun sözlərinə görə, bütün bunlar Heydər Əliyev Fondunun və şəxsən Fondun prezidenti Mehriban Əliyevanın, habelə Fondun Rusiya nümayəndəliyinin başçısı Leyla Əliyevanın dəstəyi və köməyi sayəsində mümkün olmuşdur. Professor Kamal Abdullayev dedi: “Sevindirici haldır ki, müasir Azərbaycan Heydər Əliyev siyasi xəttinin davam etdirilməsi sayəsində başını dik tutub beynəlxalq tanınma səviyyəsinə çıxır. Biz hələ çox iş görməliyik. Lakin biz doğru yoldayıq. Ulu öndər Heydər Əliyevin bizə vəsiyyət etdiyi yoldayıq”.

Gənclərin nümayəndələri Heydər Əliyev fenomeninin öyrənilməsi baxımından çox maraqlı çıxışlara görə natiqlərə minnətdarlıqlarını bildirdilər.

Rəsmi hissədən sonra ehsan verildi.

Asya Hacızadə

AZƏRTAC-ın xüsusi müxbiri

Moskva

######