Bakı, 26 sentyabr, AZƏRTAC

Spinal muskular atrofiya (SMA) nadir irsi genetik xəstəliklər arasında ən ağır fəsadları olan bir xəstəlikdir. SMA bir yaşadək uşaqlar arasında genetik xəstəliklər içərisində ən çox ölümə səbəb olan xəstəliklərin önündədir, irsiyyətlə keçir, ata və ana daşıyıcıdırsa, uşaqların 25 faizində qeydə alına bilər.

AZƏRTAC xəbər verir ki, bunu Azərbaycan Pediatriya Cəmiyyətinin sədri, Səhiyyə Nazirliyinin pediatriya sahəsi üzrə mütəxəssis-eksperti Erkin Rəhimov deyib.

E.Rəhimov bildirib ki, klassik olaraq SMA-nın 3 tipi məlum idisə, hazırda beş tipə ayrılır: "Birinci tip xüsusilə ağır növdür. Uşaqlarda çox ağır əzələ zəifliyi, tənəffüs çatışmazlığı kimi əlamətlərlə özünü büruzə verir. Xəstəlik vaxtında aşkar edildikdə müasir dövrdə yeni dərman vasitələri ilə xəstəyə normala yaxın həyat bəxş etmək olar".

Mütəxəssis-ekspert hazırda Azərbaycanda 40-dan çox SMA-dan əziyyət çəkən uşağın olduğunu diqqətə çatdırıb.