Fransa ABŞ-la rəqəmsal vergi sazişi imzalaya bilər
Bakı, 4 mart, AZƏRTAC
Fransa hökuməti 2021-ci ilin yayına qədər rəqəmsal vergi haqqında beynəlxalq sazişin imzalanacağını real sayır.
AZƏRTAC xarici saytlara istinadla xəbər verir ki, Fransanın maliyyə naziri Brüno Le Mer G20 ölkələrinin maliyyə nazirləri ilə danışıqların yekunları barədə “Twitter” paylaşımında müəssisələrin və rəqəmsal xidmətlərin vergiyə cəlb olunması barədə beynəlxalq sazişin imzalanmasına az qaldığını bildirib.
Fransa tərəfi bu sazişin imzalanması üçün yayın əvvəlinə qədər müddət qoyacaq. Nazir qeyd edib ki, ABŞ sazişin imzalanması yolundakı əngəllərin aradan qaldırılacağı niyyətində olduğunu təsdiqləyib və bu irəliyə doğru ciddi bir addımdır.
Qeyd edək ki, əksəriyyəti ABŞ-a məxsus olan iri xarici rəqəmsal şirkətlərin gəlirləri 2019-cu ildən başlayaraq Yunanıstan, Macarıstan, Türkiyə, İspaniya, İtaliya, Fransa və Böyük Britaniyada vergiyə cəlb olunur.
Bölmənin digər xəbərləri
