Fransa beynəlxalq dəyərlərə zidd davranışlar həyata keçirməkdədir - Politoloq
Bakı, 18 fevral, AZƏRTAC
Münxen Təhlükəsizlik Konfransında Rusiyanı Ukraynada işğalçılıq siyasətində ittiham edən Fransa Prezidenti Emmanuel Makron nədənsə 30 il ərzində Ermənistanın Azərbaycana qarşı işğalçılıq siyasəti və həyata keçirdiyi vandalizm aktları ilə bağlı heç bir məsələni səsləndirmədi. O, nəinki bu məsələlərə toxunmadı, Ermənistanın davamlı şəkildə aqressiv davranışları, bölgədə əldə edilə biləcək sülh prosesinə ciddi təhlükələr yaratması ilə bağlı da heç bir fikir səsləndirmədi. Bu, onu göstərir ki, artıq Fransa demokratik və Avropa dəyərlərindən tamamilə uzaqlaşıb. Fransa özünün neo-imperialist ideyalarını reallaşdırmaq, bu istiqamətdə tərəfdaşları ilə birgə beynəlxalq dəyərlərə zidd davranışlar həyat keçirmək niyyətindədir.
Bu sözləri AZƏRTAC-a açıqlamasında politoloq Anar Əliyev deyib.
O bildirib ki, Fransa Prezidenti çıxışında imperialist düşüncəli Rusiyanın fikirlərini tənqid etdiyi halda özünün təmsil etdiyi dövlətin də neo-imperialist maraqlarını davamlı şəkildə qabartmağa çalışıb. Xüsusilə də BMT təhlükəsizlik Şurası, onun formatı ilə bağlı narazılığını qeyd edib. Bununla əslində Fransa Təhlükəsizlik Şurasında Azərbaycan əleyhinə qəbul etdirmək istədiyi qətnamənin fiaskoya uğramasının əvəzini çıxmaq istəyir. Amma əslində Təhlükəsizlik Şurasında Fransa da daxil olmaqla beş daimi üzvün olması artıq müasir dünyamızın reallıqlarına qətiyyən uyğun deyil.
“Rusiyanın nəinki Ukrayna ilə bağlı, həm də yaxın Şərqdə və Qafqazda imperialist düşüncələri ilə bağlı fikirlərini səsləndirən Emmanuel Makron özünün bitərəf vasitəçi roluna qətiyyən uyğun olmayan qərəzli fikirlərini bölüşüb. Belə ikiüzlü, riyakar yanaşmalarla Fransa heç nəyə nail ola bilməz. Bununla da Fransanın Cənubi Qafqazdakı proseslərdə bitərəf vasitəçi rolu ilə bağlı məsələ kökündən və birdəfəlik həll olmuş oldu. Bütün bunlar Azərbaycanın Fransa kimi qərəzli, Ermənistanın işğalçılıq siyasətinə göz yuman, buna haqq qazandırmağa çalışan dövlətlərin bu proseslərdə iştirakçıya çevrilməsinə imkan verməyəcəyi ilə bağlı bəyanatlarında nə qədər haqlı olduğu təsdiq edilmiş oldu”, - deyə Anar Əliyev qeyd edib.
Bölmənin digər xəbərləri
