Fransa, İtaliya və Böyük Britaniya 218 “Aster” zenit-raket kompleksi sifariş edib
Paris, 16 mart, AZƏRTAC
Paris, London və Roma 218 “Aster” zenit-raket kompleksi sifariş edib, onların tədarükü sürətləndiriləcək.
AZƏRTAC xəbər verir ki, bu haqda Fransa Silahlı Qüvvələr Nazirliyi xəbər verib.
Bu, Avropa qitəsində pisləşən təhlükəsizlik vəziyyətini həll etmək üçün üç ölkə tərəfindən 2022-ci ilin dekabrında 700-ə yaxın raket üçün çərçivə sifarişinin bir hissəsidir.
Sifariş edilən raketlər “Aster 30 B1” tiplidir. Onlar Fransa və İtaliyanın SAMP-T yerdən havaya müdafiə sisteminin gələcək versiyasını, eləcə də üç ölkənin hava hücumundan müdafiə freqatlarını təchiz edəcək.
Avropa şirkəti MBDA tərəfindən istehsal edilən və 2026-cı ildə istifadəyə veriləcək “Aster 30 B1” raketi 150 kilometr radiusda 25 min metr yüksəklikdə uçan hədəfi vurmaq gücündə olacaq. O, həmçinin 5 Mach-dan (6000 km/saat) çox sürətlə uçan ortamənzilli ballistik raketləri, eləcə də hipersəs adlanan raketləri tuta biləcək.
Müqaviləyə, həmçinin Fransa hərbi gəmiləri üçün daha yaxınmənzilli “Aster 15” raketləri də daxildir. Bu sifarişin məbləği açıqlanmayıb. Fransa Beynəlxalq Münasibətlər İnstitutunun məlumatına görə, “Aster 30” raketinin qiyməti 2 milyon avrodan çox qiymətləndirilir.
MBDA 2022-ci ildən bəri “Aster” raket istehsalını 50% artırıb və istehsal müddətini 2022-ci ildəki 42 aydan 2026-cı ildə 18 aya endirməyi planlaşdırır.
Bölmənin digər xəbərləri
